അദ്ധ്യാപകരുടെ പരാതിയിൽ ഉപജില്ലാ വിദ്യാഭ്യാസ ഓഫീസിൽ മന്ത്രിയുടെ പരിശോധന

കണ്ണൂർ: എയ്ഡഡ് സ്‌കൂളുകളിലെ അദ്ധ്യാപക നിയമനം തടസ്സപ്പെടുത്തിയെന്ന പരാതിയെ തുടർന്ന് മന്ത്രി വി.ശിവൻകുട്ടി കണ്ണൂർ നോർത്ത് ഉപജില്ലാ വിദ്യാഭ്യാസ ഓഫീസിൽ മിന്നൽ പരിശോധന നടത്തി. ഒരാഴ്ചയ്ക്കകം അന്വേഷിച്ച് റിപ്പോർട്ട് സമർപ്പിക്കാൻ മന്ത്രി ജില്ലാ വിദ്യാഭ്യാസ ഡയറക്ടർക്ക് നിർദ്ദേശം നൽകി. കണ്ണൂർ മുണ്ടേരി ഗവ.ഹയർസെക്കൻഡറി സ്‌കൂളിൽ നടന്ന പരിപാടിക്കിടെയാണ് വാരം യു.പി സ്‌കൂളിലെ അദ്ധ്യാപകരായ അഞ്ജു,ശുഭ,അർജുൻ എന്നിവർ മന്ത്രിയെ നേരിട്ട് കണ്ട് തങ്ങളുടെ നിയമനം എട്ട് വർഷത്തോളമായി തടഞ്ഞുവച്ചതായി പരാതിപ്പെട്ടത്. തുടർന്ന് മന്ത്രി ഉദ്യോഗസ്ഥരോടൊപ്പം തന്നെ ഉപജില്ലാ വിദ്യാഭ്യാസ ഓഫീസിലെത്തി. 2017 മുതൽ അദ്ധ്യാപികയായി ജോലി ചെയ്യുന്ന ശുഭ, 2018 മുതൽ ജോലി ചെയ്യുന്ന അഞ്ജു,അർജുൻ എന്നിവർക്ക് നിയമന പ്രശ്നം കാരണം ശമ്പളമോ മറ്റ് ആനുകൂല്യങ്ങളോ ലഭിക്കുന്നില്ല. സ്‌കൂൾ മാനേജ്‌മെന്റിന്റെയോ ഉദ്യോഗസ്ഥരുടെയോ ഭാഗത്ത് വീഴ്ച സംഭവിച്ചിട്ടുണ്ടെങ്കിൽ ശക്തമായ നടപടിയെടുക്കാൻ മന്ത്രി നിർദ്ദേശിച്ചു.