ധനുഷിനെക്കുറിച്ച് ആദ്യമായി വെളിപ്പെടുത്തി മൃണാൾ താക്കൂർ, തുറന്നുപറഞ്ഞത് ഒരഭിമുഖത്തിൽ

ന്യൂഡൽഹി: നടൻ ധനുഷുമായി പ്രണയത്തിലാണെന്ന അഭ്യൂഹങ്ങളിൽ ആദ്യമായി പ്രതികരിച്ച് നടി മൃണാൾ താക്കൂർ. പരക്കുന്നത് അഭ്യൂഹങ്ങൾ ആണെന്നും ധനുഷ് നല്ലൊരു സുഹൃത്ത് മാത്രമാണെന്നും താരം ഒരഭിമുഖത്തിൽ പറഞ്ഞതായി ഒൺലി കോളിവുഡ് എന്ന മാദ്ധ്യമം റിപ്പോർട്ട് ചെയ്യുന്നു.

'ഞങ്ങൾ രണ്ടുപേരും പ്രണയത്തിലാണെന്ന തരത്തിൽ അടുത്തിടെയായി ധാരാളം വാർത്തകൾ പ്രചരിക്കുന്നുണ്ടെന്ന് അറിയാം. അത് കണ്ടപ്പോൾ തമാശയായി തോന്നി. സൺ ഒഫ് സർദാർ 2വിന്റെ പ്രദർശനത്തിലേയ്ക്ക് ധനുഷിനെ ഞാൻ വ്യക്തിപരമായി ക്ഷണിച്ചിട്ടില്ല. നടൻ അജയ് ദേവ്‌ഗണാണ് ക്ഷണിച്ചത്. പരിപാടിയിൽ ധനുഷ് പങ്കെടുത്തതിനെക്കുറിച്ച് ആരും അധികം ചിന്തിച്ച് തലക്കേണ്ട'- എന്ന് നടി പറഞ്ഞതായാണ് ഒൺലി കോളിവുഡ് റിപ്പോർട്ട് ചെയ്യുന്നത്.

അടുത്തിടെ ചില പരിപാടികളിൽ ഇരുവരും ഒരുമിച്ച് പങ്കെടുത്തതാണ് ഗോസിപ്പുകൾക്ക് വഴിതുറന്നത്. കഴിഞ്ഞ ഓഗസ്റ്റ് ഒന്നിനായിരുന്നു മൃണാൾ താക്കൂറിന്റെ പിറന്നാളാഘോഷം നടന്നത്. ഈ പരിപാടിയിൽ ധനുഷ് എത്തിയിരുന്നു. കൂടാതെ മൃണാളിന്റെ ബോളിവുഡ് ചിത്രം സൺ ഓഫ് സർദാർ 2ന്റെ ചിത്രത്തിന്റെ പ്രത്യേക പ്രദർശനത്തിനും ധനുഷ് മുംബയിലെത്തിയിരുന്നു. ഈ ചടങ്ങിൽ മൃണാളും ധനുഷും കൈപിടിച്ച് സൗഹൃദം പങ്കിടുന്നതിന്റെ വീഡിയോ സോഷ്യൽ മീഡിയയിൽ ചർച്ചയായിരുന്നു. ധനുഷിന്റെ വരാനിരിക്കുന്ന ചിത്രമായ തേരേ ഇഷ്‌ക് മേയ്ക്കായി എഴുത്തുകാരിയും നിർമ്മാതാവുമായ കനിക ദില്ലൺ കഴിഞ്ഞ ജൂലായിൽ സംഘടിപ്പിച്ച പാർട്ടിയിൽ മൃണാൾ പങ്കെടുത്തിരുന്നു. ധനുഷും മൃണാളും ഒരുമിച്ച് ഫോട്ടോയ്ക്ക് പോസ് ചെയ്യുന്ന ചിത്രങ്ങളും കനിക പങ്കുവച്ചിരുന്നു. ഇപ്പോഴിതാ ധനുഷിന്റെ സഹോദരിമാരായ ഡോ.കാർത്തികയെയും വിമല ഗീതയെയും മൃണാൾ ഇൻസ്റ്റാഗ്രാമിൽ പിന്തുടരുന്നുണ്ട്.