സീനിയർ ജേർണലിസ്റ്റ് ഫോറം ദേശീയ സമ്മേളനം

തിരുവനന്തപുരം: രാജ്യത്തെ മുതിർന്ന മാദ്ധ്യമപ്രവർത്തകരുടെ സംഘടനയായ സീനിയർ ജേർണലിസ്റ്റ് ഫോറം ദേശീയ സമ്മേളനം ഇന്ന് മുതൽ തിരുവനന്തപുരത്ത് നടക്കും. നാളെ വൈകിട്ട് 4ന് തൈക്കാട് ഗവ.ഗസ്റ്റ് ഹൗസ് ഓഡിറ്റോറിയത്തിൽ സമ്മേളനം മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. ഫോറം പ്രസിഡന്റ് അലക്സാണ്ടർ സാം അദ്ധ്യക്ഷത വഹിക്കും. മന്ത്രി ജി.ആർ.അനിൽ, എം.പിമാരായ അടൂർ പ്രകാശ്, ശശി തരൂർ തുടങ്ങിയവർ പങ്കെടുക്കും. മുതിർന്ന മാദ്ധ്യമ പ്രവർത്തകനും മുൻ രാജ്യസഭ എം.പിയുമായ എം.പി.അച്യുതൻ പതാക ഉയർത്തും.

സമ്മേളനത്തോടനുബന്ധിച്ച് ഇന്ന് ഉച്ചകഴിഞ്ഞ് 2ന് തൈക്കാട് ഭാരത് ഭവനിൽ നടക്കുന്ന അന്താരാഷ്ട്ര ഫോട്ടോ എക്സിബിഷൻ മന്ത്രി എം.ബി.രാജേഷ് ഉദ്ഘാടനം ചെയ്യും. കേരള മീഡിയ അക്കാഡമി ചെയർമാൻ ആർ.എസ്.ബാബു അദ്ധ്യക്ഷത വഹിക്കും. വൈകിട്ട് 4ന് പ്രസ് ക്ലബിൽ നടക്കുന്ന ഐക്യദാർഢ്യസമ്മേളനം മന്ത്രി വി.ശിവൻകുട്ടി ഉദ്ഘാടനം ചെയ്യും. മുൻ കേന്ദ്രമന്ത്രി പ്രൊഫ.കെ.വി.തോമസ് അദ്ധ്യക്ഷത വഹിക്കും.

ഉദ്ഘാടന സമ്മേളനത്തിന് ശേഷം നാളെ വൈകിട്ട് 5.30ന് ദേശീയ മാദ്ധ്യമ സെമിനാറും 21ന് രാവിലെ 11ന് പ്രതിനിധി സമ്മേളനവും നടക്കുമെന്ന് മീഡിയ അക്കാഡമി ചെയർമാൻ ആർ.എസ്.ബാബു, സ്വാഗതസംഘം ചെയർമാൻ ജോൺ മുണ്ടക്കയം, ജനറൽ കൺവീനർ കരിയം രവി, എസ്.ജെ.എഫ്.കെ ജനറൽ സെക്രട്ടറി കെ.പി.വിജയകുമാർ, വൈസ് പ്രസിഡന്റ് ടി.ശശിമോഹൻ എന്നിവർ വാർത്താസമ്മേളനത്തിൽ അറിയിച്ചു.