കാട്ടാന ജനവാസ മേഖലയിലെ കിണറ്റിൽ വീണു; എംഎൽഎയുടെ നേതൃത്വത്തിൽ പ്രതിഷേധം, കളക്‌ടർ സ്ഥലത്തെത്തി

കൊച്ചി: ജനവാസ മേഖലയിലെ കിണറ്റിൽ കാട്ടാന വീണു. എറണാകുളം കോതമംഗലത്താണ് സംഭവം. കോട്ടപ്പടി വടക്കുംഭാഗം വിച്ചാട്ട് വർഗീസിന്റെ കിണറ്റിലാണ് ആന വീണത്. ഇന്നലെ രാത്രിയാണ് സംഭവം.

പത്ത് വയസുവരുന്ന കൊമ്പനാണ് കിണറ്റിൽ അകപ്പെട്ടിരിക്കുന്നത്. ഇന്നുരാവിലെയാണ് പ്രദേശവാസികൾ കിണറ്റിനുള്ളിൽ ആനയെ കണ്ടത്. തുടർ‌ന്ന് വന്യജീവി സംഘർഷത്തിന് പരിഹാരമുണ്ടാക്കാതെ ആനയെ കയറ്റിവിടില്ലെന്ന് പറഞ്ഞ് എംഎൽഎ ആന്റണി ജോണിന്റെ നേതൃത്വത്തിൽ നാട്ടുകാർ പ്രതിഷേധിച്ചു. കളക്‌ടർ സ്ഥലത്തെത്തിയതോടെയാണ് പ്രതിഷേധം അവസാനിപ്പിച്ചത്. പ്രതിഷേധത്തെത്തുടർന്ന് കിണറിടിച്ച് ആനയെ കരയ്ക്കുകയറ്റുന്ന രക്ഷാദൗത്യം നിർത്തിവച്ചിരുന്നു.

കിണറിന്റെ ഉടമയ്ക്ക് നഷ്ടപരിഹാരം നൽകുന്നതിൽ ഡിഎഫ്‌ഒയെ ചുമതലപ്പെടുത്തും. സോളാർ ഫെൻസിംഗിന്റെ കാര്യത്തിൽ തീരുമാനമുണ്ടാകും. അതിനായുള്ള പ്രവർത്തനങ്ങൾ മുന്നോട്ട് കൊണ്ടുപോകാനുള്ള എല്ലാ നടപടികളും സ്വീകരിക്കുമെന്നും ജില്ലാ കളക്ടർ ജി പ്രിയങ്ക ഉറപ്പുനൽകി. രക്ഷാദൗത്യം താമസിയാതെ പുനഃരാരംഭിക്കുമെന്നാണ് വിവരം.