ഓണം സ്പെഷ്യൽ ഡ്രൈവ്; 101കുപ്പി വിദേശമദ്യം പിടികൂടി, മദ്യം സൂക്ഷിച്ചത് വീട്ടിലെ രഹസ്യ അറയിൽ

ബാലരാമപുരം: എക്സൈസ് ഓണം സ്പെഷ്യൽ ഡ്രൈവിന്റെ ഭാഗമായി വീട്ടിലെ രഹസ്യ അറയിൽ സൂക്ഷിച്ചിരുന്ന 101 കുപ്പി വിദേശ മദ്യം എക്സൈസ് സംഘം പിടികൂടി. പെരിങ്ങമല ഇടുവ സ്വദേശി ബ്രിജേഷി(45)​ന്റെ വീട്ടിൽ നിന്നാണ് 101 കുപ്പികളിലായി സൂക്ഷിച്ച 50 ലിറ്ററിലേറെ വിദേശമദ്യം എക്സൈസ് പിടികൂടിയത്. വീടിന്റെ വാതിലിനോട് ചേർന്നുള്ള രഹസ്യ അറയിലാണ് മദ്യം സൂക്ഷിച്ചിരുന്നത്. എക്സൈസ് ഇൻസ്പെക്ടർ പ്രശാന്ത്,​പ്രിവന്റീവ് ഓഫീസർമാരായ രാജേഷ് കുമാർ,​സിവിൽ എക്സൈസ് ഉദ്യോഗസ്ഥരായ അനീഷ്,​ലാൽകൃഷ്ണ,​പ്രസന്നൻ,​അൽത്താഫ്,​വിനോദ്,​അഖിൽ,​വനിതാ സിവിൽ പൊലീസ് ഓഫീസർ വിഷ്ണുശ്രീ എന്നിവരുടെ നേതൃത്വത്തിലായിരുന്നു റെയ്ഡ്. അബ്കാരി കേസിൽ ബ്രിജീഷിനെതിരെ നിരവധി കേസ് നിലവിലുണ്ട്. കോടതിയിൽ ഹാജരാക്കി റിമാൻഡ് ചെയ്തു.