ഒടുവിൽ റോയലായി മടക്കം

തിരുവനന്തപുരം: സീസണിലെ തങ്ങളുടെ അവസാന മത്സരത്തിൽ ആലപ്പി റിപ്പിൾസിനെതിരെ ഉജ്ജ്വല വിജയവുമായി ട്രിവാൻഡ്രം റോയൽസിന്റെ സൈൻഓഫ്. 110 റൺസിനാണ് ട്രിവാൻഡ്രം ആലപ്പിയെ തോല്പിച്ചത്. ആദ്യം ബാറ്റ് ചെയ്ത റോയൽസ് 20 ഓവറിൽ അഞ്ച് വിക്കറ്റ് നഷ്ടത്തിൽ 208 റൺസെടുത്തു. മറുപടി ബാറ്റിംഗിന് ഇറങ്ങിയ ആലപ്പി 17 ഓവറിൽ 98 റൺസിന് ഓൾ ഔട്ടാവുകയായിരുന്നു. തോൽവിയോടെ ആലപ്പി റിപ്പിൾസിൻ്റെ സെമി സാധ്യതകൾ മങ്ങി. റോയൽസിൻ്റെ സെമി സാധ്യതകൾ നേരത്തെ തന്നെ അവസാനിച്ചിരുന്നു. റോയൽസിന് വേണ്ടി നാല് വിക്കറ്റ് വീഴ്ത്തിയ അഭിജിത്ത് പ്രവീൺ ആണ് പ്ലെയർ ഓഫ് ദി മാച്ച്.

സൂപ്പർ സ്റ്റാർട്ട്

സീസണിലെ അവസാന മത്സരത്തിൽ ഓപ്പണർമാർ മികച്ച തുടക്കമാണ് റോയൽസിന് നൽകിയത്. ക്യാപ്ടൻ കൃഷ്ണപ്രസാദും (52 പന്തിൽ 90), വിഷ്ണുരാജും (46 പന്തിൽ 60) ചേർന്ന് 154 റൺസാണ് ആദ്യ വിക്കറ്റിൽ കൂട്ടിച്ചേർത്തത്. പതിഞ്ഞ താളത്തിലാണ് തുടങ്ങിയതെങ്കിലും പിന്നീട് ഇരുവരും കത്തിക്കയറി. 36 പന്തുകളിൽ നിന്ന് അർദ്ധസെഞ്ച്വറി തികച്ച കൃഷ്ണപ്രസാദിന് എന്നാൽ അൻപതിൽ നിന്ന് തൊണ്ണൂറിലേക്കെത്താൻ വേണ്ടി വന്നത് വെറും 16 പന്തുകൾ മാത്രമാണ്. തുടർച്ചയായ രണ്ടാം സെഞ്ച്വറിയിലേക്കെന്ന് തോന്നിച്ച കൃഷ്ണപ്രസാദിനെ 90 റൺസിൽ ശ്രീഹരി വിക്കറ്റിന് മുന്നിൽ കുടുക്കി. തൊട്ടടുത്ത ഓവറിൽ വിഷ്ണുരാജിനെ രാഹുലും പുറത്താക്കി. അവസാന ഓവറിൽ ആഞ്ഞടിച്ച എം.നിഖിലും ( പുറത്താകാതെ 7 പന്തിൽ 18), സഞ്ജീവ് സതീശനുമാണ് (12 പന്തിൽ 31) റോയൽസിൻ്റെ സ്കോർ 200 കടത്തിയത്. ആലപ്പിയ്ക്ക് വേണ്ടി ശ്രീരൂപ് 3 വിക്കറ്റ് വീഴ്ത്തി.

അഭിജിത്ത് ആക്രമണം

സൗത്ത് സോൺ ക്യാപ്ടൻ മുഹമ്മദ് അസ്‌ഹറൂദ്ദീന്റെ അഭാവത്തിൽ എ.കെ ആകർഷായിരുന്നു (56) ജലജ് സക്സേനയ്ക്കൊപ്പം (5) ആലപ്പിയുടെ ഇന്നിം‌ഗ്സ് തുറന്നത്. എന്നാൽ തുടക്കത്തിൽ തന്നെ ജലജ് സക്സേന റണ്ണൗട്ടായത് ടീമിന് തിരിച്ചടിയായി. ആകർഷും കെ.എ അരുണും (14) ചേർന്നുള്ള കൂട്ടുകെട്ട് ആലപ്പിയ്ക്ക് പ്രതീക്ഷ നല്കിയെങ്കിലും ഒൻപതാം ഓവറിൽ അരുണിനെയും അഭിഷേക് പി നായരേയും (0) മടക്കി അഭിജിത് പ്രവീൺ ആലപ്പിയുടെ മുന്നേറ്റത്തിന് തടയിട്ടു. ഒരു റൺസ് കൂടി കൂട്ടിച്ചേർക്കുന്നതിനിടെ അക്ഷയ് ടി.കെ റണ്ണൗട്ടായി. പിന്നാലെ ഒരു റണ്ണെടുത്ത മുഹമ്മദ് കൈഫിനെയും അഭിജിത്ത് പുറത്താക്കിയതോടെ ആലപ്പിയുടെ തകർച്ച പൂർണ്ണമായി. നാലോവറിൽ 18 റൺസ് മാത്രം വിട്ടുകൊടുത്താണ് അഭിജിത്ത് നാല് വിക്കറ്റ് വീഴ്ത്തിയത്.