ഇലക്ട്രിക് കാര്‍ വാങ്ങാന്‍ ആഗ്രഹിക്കുന്നവര്‍ അറിയാന്‍; വില 7.5 ലക്ഷം മുതല്‍, ഇതാ അഞ്ച് മോഡലുകള്‍

കൊച്ചി: രാജ്യത്തെ വൈദ്യുതി വാഹന വിപണിയില്‍ സാധാരണ ഉപഭോക്താക്കള്‍ക്ക് താങ്ങാവുന്ന വിലയില്‍ നിരവധി കാറുകളാണ് കമ്പനികള്‍ അവതരിപ്പിക്കുന്നത്. വലിയ കുടുംബങ്ങള്‍ മുതല്‍ വ്യക്തിഗത ഉപഭോക്താക്കള്‍ക്ക് വരെ ഉപയോഗിക്കാവുന്ന നിരവധി പുതിയ മോഡലുകള്‍ രംഗത്തുണ്ട്. ഇരുപത് ലക്ഷം രൂപയില്‍ കുറവുള്ള അഞ്ച് ഇ. വി കാര്‍ മോഡലുകളാണ് ഉപഭോക്താക്കളുടെ മനസ് കീഴടക്കുന്നത്. ടാറ്റ മോട്ടോര്‍സും എം.ജിയും മഹീന്ദ്രയുമെല്ലാം ഈ വിഭാഗത്തിലെ ഉപഭോക്താക്കള്‍ക്കായി വിവിധ കാര്‍ മോഡലുകള്‍ പുറത്തിറക്കിയിട്ടുണ്ട്. പ്രധാന മോഡലുകള്‍ ഇവയാണ്

എം.ജി കോമറ്റ്

സാധാരണക്കാര്‍ക്ക് വാങ്ങാവുന്ന വിലയിലെ ഏറ്റവും മികച്ച ഇലക്ട്രിക് കാര്‍ എം.ജിയുടെ കോമറ്റാണ്. ദൈനം ദിന ഉപയോഗത്തിന് കഴിയുന്നതും നഗരങ്ങളില്‍ ആയാസ രഹിതമായി പാര്‍ക്ക് ചെയ്യാനും കഴിയുന്ന കാറാണ് എം.ജി കോമറ്റ്. 17.3 കിലോവാട്ട് ബാറ്ററിയുമായി എം.ജി കോമറ്റില്‍ മണിക്കൂറില്‍ നൂറ് കിലോമീറ്റര്‍ വരെ വേഗതയില്‍ യാത്ര ചെയ്യാനാകും.

വില- 7.5 ലക്ഷം രൂപ(എക്‌സ് ഷോറൂം)

ടാറ്റ പഞ്ച് ഇ.വി

രാജ്യത്തെ ഏറ്റവും വിശ്വാസമുള്ള കാര്‍ കമ്പനിയായ ടാറ്റ മോട്ടോഴ്സിന്റെ പ്രധാന വൈദ്യുതി വാഹന മോഡലാണ് ടാറ്റ പഞ്ച് ഇ.വി. ആദ്യമായി ഇലക്ട്രിക് വാഹനം ഉപയോഗിക്കുന്നവര്‍ക്ക് ഏറ്റവും മികച്ച മോഡാലാണിതെന്ന് വിലയിരുത്തുന്നു. രണ്ട് ബാറ്ററി ഓപ്ഷനുകളാണുള്ളത്. 25 കിലോവാട്ട് മീഡിയം റേഞ്ച് 315 കിലോ വാട്ട് വരെ മൈലേജ് നല്‍കും. 35 കിലോ വാട്ട് റേഞ്ച് വാഹനം 421 കിലോമീറ്റര്‍ മൈലേജ് ഉറപ്പാക്കുന്നു. അത്യാധുനിക സൗകര്യങ്ങളെല്ലാം വാഹനത്തില്‍ ഒരുക്കിയിട്ടുണ്ട്.

വില - 9.99 ലക്ഷം രൂപ മുതല്‍

ടാറ്റ നെക്‌സോണ്‍ ഇ.വി

ഇരുപത് ലക്ഷം രൂപയില്‍ താഴെ വിലയിലുള്ള ഇന്ത്യയിലെ ഏറ്റവും മികച്ച ഇലക്ട്രിക് കാറുകളില്‍ മുന്‍നിരയിലാണ് ടാറ്റ നെക്സോണ്‍ ഇ.വി. രണ്ട് ബാറ്ററി ഓപ്ഷന്‍സുണ്ട്. 30 വാട്ട് മീഡിയം റേഞ്ച് ബാറ്ററിയില്‍ 325 കിലോമീറ്റര്‍ മൈലേജും 45 വാട്ട് റേഞ്ച് ബാറ്ററിയില്‍ 489 കിലോമീറ്റര്‍ മൈലേജും ലഭിക്കും. മുന്‍നിര വാഹനങ്ങളുടെ എല്ലാ സംവിധാനങ്ങളും ടാറ്റ നെക്‌സോണില്‍ ലഭ്യമാണ്.

വില - 12.48 ലക്ഷം രൂപ മുതല്‍

എം.ജി വിന്‍ഡ്സര്‍ ഇ.വി

ഇന്ത്യന്‍ വിപണിയില്‍ ഏറ്റവും മികച്ച വില്‍പ്പന നേടുന്ന ഇലക്ട്രിക് കാറാണ് എം.ജി വിന്‍ഡ്സര്‍ ഇ.വി. നടപ്പുവര്‍ഷത്തില്‍ രാജ്യത്തെ മികച്ച ഹരിത കാറെന്ന ബഹുമതിയും ലഭിച്ചു. വലിയ ബാറ്ററിയും ഉയര്‍ന്ന ഡ്രൈവിംഗ് റേഞ്ചുമുള്ള വിഭാഗത്തിലും എം.ജി വിന്‍ഡ്സര്‍ വിപണിയിലെത്തുന്നു. ഐ.പി67 സെര്‍ട്ടിഫൈഡ് 38 കിലോവാട്ട് ലിതിയം അയണ്‍ ഫോസ്ഫേറ്റ് ബാറ്ററിയോടെയാണ് വാഹനം അവതരിപ്പിക്കുന്നത്. ഒരോറ്റ ചാര്‍ജില്‍ 332 കിലോമീറ്റര്‍ വരെ യാത്ര ചെയ്യാം.

വില 13.99 ലക്ഷം രൂപ മുതല്‍ (എക്‌സ് ഷോറൂം)

മഹീന്ദ്ര ബി.ഇ 6

മികച്ച ഡിസൈനും അത്യാധുനിക സംവിധാനങ്ങളുമായി മഹീന്ദ്ര ആആന്‍ഡ് മഹീന്ദ്ര ഇന്ത്യയില്‍ അവതരിപ്പിച്ച പുതിയ മോഡലാണ് ബി.ഇ 6. നിരവധി സൗകര്യങ്ങളുള്ള കാബിന്‍, ആകര്‍ഷണീയമായ രൂപം, മികച്ച കരുത്ത് എന്നിവയാണ് ഈ വാഹനത്തിന്റെ പ്രത്യേകത. ഒരു ചാര്‍ജിംഗില്‍ 557 കിലോമീറ്റര്‍ മൈലേജ് ലഭിക്കുന്ന 59 കിലോവാട്ട് മൈലേജ് വാഹനത്തെ ഉപഭോക്താക്കളുടെ പ്രിയമോഡലാക്കുന്നു. ഏറ്റവും മികച്ച മോഡലിന് 683 കിലോമീറ്റര്‍ വരെ മൈലേജ് നല്‍കും.

വില 20 ലക്ഷം രൂപ മുതല്‍