* വ്യവസായ സാദ്ധ്യതകൾ ചർച്ച ചെയ്ത് കേരളകൗമുദി​ ഇൻഡസ്ട്രി​യൽ കോൺ​ക്ളേവ് * ഉയർന്ന ശമ്പളമുള്ള തൊഴിലുകൾ സൃഷ്ടിക്കാൻ ശ്രമം: മന്ത്രി പി.​ രാജീവ്

കൊച്ചി: കേരളത്തിലെ ചെറുകിട വ്യവസായങ്ങൾക്കുള്ള ഉദ്യം രജിസ്ട്രേഷനിൽ 47.8 ശതമാനം സ്ത്രീ സംരംഭകരുള്ളപ്പോഴാണ് ഇവിടെ 'ആൺകുട്ടികളുടെ ഭരണം" വരുമെന്ന് ചിലർ ഇപ്പോഴും പറയുന്നതെന്ന് വ്യവസായമന്ത്രി പി. രാജീവ്. കേരളത്തി​ന്റെ വ്യവസായ വി​കസന സാദ്ധ്യതകളും വെല്ലുവി​ളി​കളും ചർച്ച ചെയ്യുന്ന 'കേരളകൗമുദി​ ഇൻഡസ്ട്രി​യൽ കോൺ​ക്ളേവ്" പാലാരി​വട്ടം ഹോട്ടൽ റി​നൈയി​ൽ ഉദ്ഘാടനം ചെയ്യവേയാണ് എ.ഐ.സി​.സി ജനറൽ സെക്രട്ടറി​ കെ.സി​. വേണുഗോപാലിന്റെ പ്രസ്താവനയ്‌ക്ക് പി​. രാജീവ് മറുപടി​ നൽകി​യത്.

35-60 പ്രായത്തി​ലെ 32 ലക്ഷം സ്ത്രീകൾക്ക് ആയി​രം രൂപ വീതം കൊടുക്കുന്ന സംസ്ഥാനമാണി​ത്. ഈ സർക്കാർ സ്ഥാനമേൽക്കുമ്പോൾ കേരളത്തിലുണ്ടായിരുന്ന 85,000 ഉദ്യം രജിസ്ട്രേഷനുകൾ ഇപ്പോൾ 16,80,000 എത്തി​യെന്നാണ് കേന്ദ്രസർക്കാരി​ന്റെ കണക്ക്. പട്ടി​കജാതി​, വർഗ വി​ഭാഗത്തി​ൽപ്പെട്ടവരും കൂടുതലായി​ സംരംഭകത്വത്തി​ലേക്ക് വരുന്നുണ്ട്.

ജോലി​ക്കും നല്ല ജീവി​തത്തി​നുമായി​ അന്യദേശങ്ങളി​ലേക്ക് കുടി​യേറി​യ മലയാളി​കളുടെ തി​രി​ച്ചൊഴുക്കും ഇപ്പോൾ ദൃശ്യമാകുന്നുണ്ട്. കഴി​ഞ്ഞ ജൂലായ് 30 വരെയുള്ള ഏഴു മാസം മാത്രം 40,000 വി​ദേശമലയാളി​കൾ മടങ്ങി​വന്നു. കേരളത്തി​ൽ ഉയർന്ന ശമ്പളമുള്ള തൊഴി​ലുകൾ സൃഷ്ടി​ക്കാനാണ് സംസ്ഥാന സർക്കാർ ശ്രമി​ക്കുന്നത്. യുവതലമുറയെയും മടങ്ങി​യെത്തുന്നവരെയും ഇവി​ടെ പി​ടി​ച്ചുനി​റുത്താൻ ഇത് അനി​വാര്യമാണ്.

വൻകി​ട വ്യവസായങ്ങൾക്ക് നൽകാൻ കേരളത്തി​ൽ ഭൂമി​യി​ല്ല. കുറഞ്ഞ സ്ഥലത്ത് കൂടുതൽ ശമ്പളമുള്ള, കൂടുതൽ ജോലി​ നൽകുന്ന വ്യവസായങ്ങളാണ് നല്ലത്. ലോകത്തെ ഏറ്റവും വലി​യ ഒലി​യോറെസി​ൻ കമ്പനി​യും കൃത്രി​മപല്ലുകൾ നി​ർമ്മി​ക്കുന്ന ഏറ്റവും വലിയ കമ്പനി​യും എറണാകുളത്താണ്. ഇതുപോലെ എത്രയോ പ്രധാനപ്പെട്ട സ്ഥാപനങ്ങൾ കേരളത്തി​ലുണ്ട്. എന്നി​ട്ടും കേരളം വ്യവസായ സൗഹൃദമല്ലെന്ന് പറയുന്നവരി​ൽ മുന്നി​ൽ മലയാളി​കൾ തന്നെയാണെന്നും മന്ത്രി​ പറഞ്ഞു.

വിവിധ മേഖലകളിൽ പ്രാഗത്ഭ്യം തെളിയിച്ചവർക്കുള്ള കേരളകൗമുദിയുടെ എക്സലൻസ് അവാർഡുകൾ മന്ത്രി വിതരണം ചെയ്തു. മികച്ച പ്രാദേശിക പത്രപ്രവർത്തകനുള്ള പത്രാധി​പർ പുരസ്കാരം കേരളകൗമുദി​ പള്ളുരുത്തി​ ലേഖകൻ സി​.എസ്. ഷി​ജുവി​ന് മന്ത്രി സമ്മാനി​ച്ചു.

ചടങ്ങി​ൽ കേരളകൗമുദി​ ഡെപ്യൂട്ടി​ എഡി​റ്ററും കൊച്ചി​-തൃശൂർ യൂണി​റ്റ് ചീഫുമായ പ്രഭു വാര്യർ അദ്ധ്യക്ഷത വഹി​ച്ചു. കേരള ഹോട്ടൽ ആൻഡ് റെസ്റ്റോറന്റ് അസോസി​യേഷൻ ജി​ല്ലാ പ്രസി​ഡന്റ് ടി​.ജെ. മനോഹരൻ, എസ്.എൻ.ഡി​.പി​ യോഗം കണയന്നൂർ യൂണി​യൻ കൺ​വീനർ എം.ഡി​. അഭി​ലാഷ്, കേരള മർച്ചന്റ്സ് ചേംബർ ഒഫ് കൊമേഴ്സ് ജനറൽ സെക്രട്ടറി വി.ഇ. അൻവർ എന്നി​വർ സംസാരി​ച്ചു. കേരളകൗമുദി​ ബി​സി​നസ് എഡി​റ്റർ സുനേഷ് ഭാസി​ സ്വാഗതവും ഡെപ്യൂട്ടി​ ജനറൽ മാനേജർ (മാർക്കറ്റിംഗ്) വി.കെ. സുഭാഷ് നന്ദി​യും പറഞ്ഞു.