ഷെയർ ട്രേഡിംഗ് തട്ടിപ്പ്: ഒരാൾകൂടി അറസ്റ്റിൽ

കൊല്ലം: ഷെയർ ട്രേഡിംഗിന്റെ മറവിൽ കിളികൊല്ലൂർ സ്വദേശിയിൽ നിന്ന് 1 കോടി 75 ലക്ഷത്തിലധികം രൂപ തട്ടിയെടുത്ത സംഘത്തിലെ ഒരാൾ കൂടി പിടിയിൽ. എറണാകുളം പള്ളുരുത്തി ഗുരുനഗർ റോഡിൽ കുന്നത്ത്പീടികയിൽ വീട്ടിൽ നൗഷാദാണ് (49)​പിടിയിലായത്. കൊല്ലം സിറ്റി പൊലീസ് കമ്മിഷണർ കിരൺ നാരായണന്റെ നിർദ്ദേശപ്രകാരം സൈബർ പൊലീസ് നടത്തിയ അന്വേഷണത്തിൽ നേരത്തെ അറസ്റ്റിലായ കണ്ണൂർ കടാച്ചിറ സ്വദേശികളായ റെയീസ്(40), നാസീം(26) എന്നിവരുടെ ബാങ്ക് അക്കൗണ്ടുകൾ വഴിയാണ് പണം തട്ടിയെടുത്തതെന്ന് കണ്ടെത്തി. ഈ അക്കൗണ്ടുകൾ നൗഷാദാണ് കൈകാര്യം ചെയ്തിരുന്നത്. സിറ്റി ഡി.സി.ആർ.ബി അസി.പൊലീസ് കമ്മിഷണർ എ.നസീറിന്റെ നിർദ്ദേശപ്രകാരം കൊല്ലം സിറ്റി സൈബർ പൊലീസ് സ്റ്റേഷൻ ഇൻസ്‌പെക്ടർ അബ്ദുൽ മനാഫിന്റെ നേതൃത്വത്തിൽ എസ്.ഐ മാരായ ഗോപകുമാർ, നജീബ്, നന്ദകുമാർ, സി.പി.ഒ ഫിറോസ് എന്നിവരടങ്ങിയ സംഘമാണ് പ്രതിയെ പിടികൂടിയത്.