ഭൂരിഭാഗംപേരും പണം തിരിച്ചടയ്ക്കുന്നില്ല; ഈ പോക്ക് പോയാല്‍ നിരവധി സ്ഥാപനങ്ങള്‍ക്ക് പൂട്ട് വീഴും

വായ്പാ തിരിച്ചടവ് മുടക്കി ചെറുകിട സ്ഥാപനങ്ങള്‍

കൊച്ചി: ഉപഭോക്താക്കള്‍ വ്യാപകമായി തിരിച്ചടവ് മുടക്കുന്നതും പ്രവര്‍ത്തനത്തിനാവശ്യമായ മൂലധനം കണ്ടെത്താനാകാത്തതും രാജ്യത്തെ മൈക്രോ ഫിനാന്‍സ് മേഖലയ്ക്ക് കടുത്ത വെല്ലുവിളിയാകുന്നു. ബിസിനസ് വികസനത്തിന് ആവശ്യമായ ഫണ്ട് കണ്ടെത്താന്‍ കഴിയാത്തതിനാല്‍ രാജ്യത്തെ നിരവധി ചെറുകിട മൈക്രോ ഫിനാന്‍സ് സ്ഥാപനങ്ങളാണ് ബാങ്ക് വായ്പകളുടെ തിരിച്ചടവ് മുടക്കുന്നത്. ഗ്രാമീണ, കാര്‍ഷിക മേഖലകളിലെ വരുമാനം കുറഞ്ഞ ഉപഭോക്താക്കള്‍ക്ക് ഈടില്ലാതെ വായ്പകള്‍ നല്‍കിയിരുന്ന ഏഴിലധികം മൈക്രോ ഫിനാന്‍സ് സ്ഥാപനങ്ങളാണ് അടച്ചുപൂട്ടലിലേക്ക് നീങ്ങുന്നത്. കേന്ദ്ര ധനമന്ത്രാലയം ഇടപെട്ട് ആവശ്യമായ മൂലധനം ലഭ്യമാക്കിയില്ലെങ്കില്‍ ഇവയുടെ പ്രവര്‍ത്തനം നിലയ്ക്കുമെന്ന് വിദഗ്ദ്ധര്‍ പറയുന്നു.

ചെറുകിട ബാങ്കിംഗ് ഇതര ധനസ്ഥാപനങ്ങളുടെ മൈക്രോ ഫിനാന്‍സ് വിഭാഗമാണ് ഏറെയും പ്രതിസന്ധി നേരിടുന്നത്. വി.എഫ്.എസ് കാപ്പിറ്റല്‍, കര്‍ണാടകയിലെ നവചേതന മൈക്രോഫിന്‍ സര്‍വീസസ്, രാജസ്ഥാനിലെ അര്‍ത്ത് ഫിനാന്‍സ്, ഇന്‍ട്രാട്രേഡ് എന്നിവയാണ് ഈയിടെ ബാങ്കുകളിലെ വായ്പാ തിരിച്ചടവ് മുടക്കിയത്. ഒരു ഉപഭോക്താവിന് തന്നെ വലിയ പരിശോധനയില്ലാതെ വായ്പകള്‍ വീണ്ടും വാരിക്കോരി നല്‍കിയതാണ് പല സ്ഥാപനങ്ങളെയും പ്രതിസന്ധിയിലാക്കിയത്.

ബിസിനസ് കുത്തനെ ഇടിയുന്നു

കഴിഞ്ഞ സാമ്പത്തിക വര്‍ഷത്തില്‍ ഇന്ത്യയുടെ മൈക്രോ വായ്പാ ബിസിനസ് 17 ശതമാനം ഇടിവോടെ 3.46 ലക്ഷം കോടി രൂപയിലെത്തി. സജീവമായ വായ്പാ ഇടപാടുകാരുടെ എണ്ണം 20 ശതമാനം കുറഞ്ഞ് 13.2 കോടിയായി. നടപ്പു സാമ്പത്തിക വര്‍ഷം രണ്ടാം ത്രൈമാസക്കാലയളവില്‍ ഓഹരി വിപണിയില്‍ ലിസ്റ്റ് ചെയ്ത മൈക്രോ ഫിനാന്‍സ് സ്ഥാപനങ്ങളായ ഫ്യൂഷന്‍ ഫിനാന്‍സ്, സ്പന്ദന സ്ഫൂര്‍ട്ടി ഫിനാന്‍സ് എന്നിവ കനത്ത നഷ്ടമാണ് നേരിട്ടത്.

ബാങ്കുകള്‍ക്കും വെല്ലുവിളി

ചെറുകിട മൈക്രോഫിനാന്‍സ് സ്ഥാപനങ്ങളുടെ പ്രതിസന്ധി ഇന്ത്യയിലെ ബാങ്കിംഗ് മേഖലയിലും വെല്ലുവിളി ഉയര്‍ത്തുന്നു. ഈ മേഖലയിലെ സ്ഥാപനങ്ങള്‍ വായ്പ തിരിച്ചടി മുടക്കിയതോടെ ബന്ധന്‍ ബാങ്ക്, ഇന്‍ഡസ് ഇന്‍ഡ് ബാങ്ക്, ഐ.ഡി.എഫ്.സി ബാങ്ക്, ആര്‍.ബി.എല്‍ ബാങ്ക് എന്നിവയുടെ അറ്റാദായം കുറഞ്ഞു.