എം.എൽ.എയ്ക്കും ഭാര്യയ്ക്കും വോട്ടില്ല!

തിരുവല്ല: എസ്.ഐ.ആർ നടപ്പാക്കുന്ന 2002ലെ വോട്ടർ പട്ടികയിൽ ജനതാദൾ (എസ്) സംസ്ഥാന പ്രസിഡന്റ് മാത്യു ടി.തോമസ് എം.എൽ.എയുടെയും ഭാര്യ അച്ചാമ്മ അലക്സിന്റെയും പേരില്ല. ബി.എൽ.ഒയാണ് വിവരം എം.എൽ.എയെ അറിയിച്ചത്. പേരില്ലാതായത് വിചിത്രമാണെന്ന് എം.എൽ.എ പ്രതികരിച്ചു. നേരത്തെ മാവേലിക്കരയിലായിരുന്നു വോട്ട്. തിരുവല്ലയിലേക്ക് താമസം മാറിയശേഷം 1989 മുതൽ എല്ലാ തിരഞ്ഞെടുപ്പിലും താനും ഭാര്യയും ഇവിടെ വോട്ടു ചെയ്തിട്ടുണ്ട്. ആറുതവണ നിയമസഭാ തിരഞ്ഞെടുപ്പിൽ മത്സരിച്ചു. അഞ്ചുതവണ എം.എൽ.എയായി. 2014ലെ പാർലമെന്റ് തിരഞ്ഞെടുപ്പിൽ കോട്ടയം സീറ്റിലും മത്സരിച്ചു. പുതുക്കിയ വോട്ടർ പട്ടികയിൽ രണ്ടുപേരുടെയും പേരു ചേർക്കണമെന്ന് ആവശ്യപ്പെട്ട് എം.എൽ.എ തിരഞ്ഞെടുപ്പ് കമ്മിഷന് പരാതി നൽകി.