ആറ്റിങ്ങലിൽ റവന്യൂ ജില്ല സ്കൂൾ കലോത്സവത്തിന് ഇന്ന് തിരിതെളിയും

ആറ്റിങ്ങൽ: തിരുവനന്തപുരം റവന്യൂ ജില്ല സ്കൂൾ കലോത്സവത്തിന് ഇന്ന് ആറ്റിങ്ങലിൽ തിരിതെളിയും. തദ്ദേശ തിരഞ്ഞെടുപ്പിന്റെ പെരുമാറ്റച്ചട്ടം നിലനിൽക്കുന്നതിനാൽ ഉദ്ഘാടനച്ചടങ്ങ് ഔദ്യോഗികമാകും. രാവിലെ 9ന് പെതുവിദ്യാഭ്യാസ അഡീഷണൽ ഡയറക്ടർ ആർ.എസ്. ഷിബു 5 ദിവസം നീണ്ടുനിൽക്കുന്ന കലോത്സവം ഉദ്ഘാടനം ചെയ്യും. 317 മത്സര ഇനങ്ങളിൽ ജില്ലയിലെ 12 വിദ്യാഭ്യാസ ഉപജില്ലകളിൽ നിന്നായി 5944 പെൺകുട്ടികളും 2706 ആൺകുട്ടികളും അടക്കം 8650 മത്സരാർത്ഥികൾ പങ്കെടുക്കും. ആറ്റിങ്ങലിലെ വിവിധ സ്കൂളുകളിലെ 14 വേദികളിലാണ് മത്സരങ്ങൾ നടക്കുന്നത്. ആറ്റിങ്ങൽ ഗവ. കോളേജ് ഗ്രൗണ്ടിലാണ് ഭക്ഷണം ഒരുക്കിയിരിക്കുന്നത്. പഴയിടം മോഹനൻ നമ്പൂതിരിയാണ് കലവറയുടെ ചുമതല. ദിവസവും മൂന്ന് നേരങ്ങളിലായി 4000 ത്തിലധികം പേർക്കാണ് ഭക്ഷണം ഒരുക്കുന്നത്. ആദ്യദിനമായ ഇന്ന് രചനാമത്സരങ്ങളും, സംസ്കൃതോത്സവം,അറബിക് കലോത്സവം,നാടോടി നൃത്തം,പ്രസംഗം(എച്ച്.എസ്, എസ്),ഉറുദു പദ്യം ചൊല്ലൽ, ചെണ്ട,തായമ്പക,ചെണ്ടമേളം,പഞ്ചവാദ്യം(എച്ച്.എസ്, എച്ച്.എസ്.എസ്), ഭരതനാട്യം,ലളിതഗാനം, സംഘഗാനം(എച്ച്.എസ്) എന്നിവ നടക്കും.