അന്ന് ചുവരെഴുത്തുകാരൻ, ഇന്ന് സിനിമകളുടെ ചിത്രകലാകാരൻ

തൊടുപുഴ: പെരിങ്ങാശ്ശേരിയെന്ന മലയോര ഗ്രാമത്തിലെ നാട്ടിൻപുറങ്ങളിൽ ബാന‌ർ വരയും ചുവരെഴുത്തുമായി നടന്ന ഒരു യുവാവ് ഇന്ന് തെന്നിന്ത്യൻ സിനിമയുടെ വരെ പ്രധാന ചിത്രകലാകാരനായിരിക്കുന്നു. കളക്ഷൻ റെക്കാഡുകളെല്ലാം ഭേദിച്ച് തീയേറ്ററുകളിൽ നിറഞ്ഞോടിയ ലോകഃ ചാപ്ടർ 1: ചന്ദ്ര" എന്ന മലയാള ചിത്രത്തിന്റെ ചിത്രകലകൾക്ക് നേതൃത്വം നൽകിയ ബിജു മാത്യുവാണ്. വര മാത്രമല്ല, മിനിയേച്ചറും ഡമ്മി സാധനങ്ങളുടെ നിർമ്മാണവുമടക്കമുള്ള സിനിമയിലെ കലാപ്രവർത്തനങ്ങളെല്ലാം ബിജുവിന്റെ കൈയിൽ ഭദ്രമാണ്. 1990- 92 കാലഘട്ടത്തിൽ പ്രീഡിഗ്രി പഠനശേഷമാണ് പൂർണമായും വരയിലേക്കിറങ്ങിയത്. 15 വർഷത്തോളം വെയിലും മഴയുമേറ്റ് നാട്ടിലും തൊടുപുഴ നഗരത്തിലുമായെല്ലാം ബിജു തന്റെ കലാ സൃഷ്ടികൾ കോറിയിട്ടു. അപ്പോഴെല്ലാം കലശലായ സിനിമാ മോഹം ഉള്ളിലൊളിപ്പിച്ചു. ഈ മോഹം 2012ൽ മമ്മൂട്ടി നായകനായ 'ജവാൻ ഒഫ് വെള്ളിമല"യിലൂടെ പൂവണിഞ്ഞു. പിന്നീട് തമിഴിലും മലയാളത്തിലുമായി 35 ചിത്രങ്ങൾക്കായി ജീവൻ തുടിക്കുന്ന പല ചിത്രങ്ങളും വരച്ചത് ബിജുവിന്റെ കൈകളാണ്. സൂപ്പർ താരങ്ങളായ മമ്മൂട്ടി, മോഹൻലാൽ മുതൽ ടൊവിനോ, ആന്റണി പെപ്പേ, നസ്ലെൻ വരെയുള്ള നിരവധി നായകനടന്മാരുടെ ചിത്രങ്ങളിൽ ഭാഗമായിക്കഴിഞ്ഞു. തമിഴിൽ ആര്യ, അർജുൻദാസ് എന്നിവരുടെ ചിത്രങ്ങളിലാണ് വർക്ക് ചെയ്തത്. ചെറുപ്പം മുതൽ വരയോട് താത്പര്യമുണ്ടായിരുന്ന മാക്കൽ വീട്ടിൽ ബിജു മാത്യു സ്‌കൂളിൽ ചിത്രരചനാ മത്സരങ്ങളിൽ സജീവമായിരുന്നു. നാട്ടിലെ സാംസ്‌കാരിക കൂട്ടായ്മകൾ വഴിയും വരയെ പരിപോഷിപ്പിച്ചു. ഒമ്പതാം ക്ലാസിൽ പഠിക്കുമ്പോൾ ആലപ്പുഴയിൽ നടന്ന 1988ലെ സംസ്ഥാന സ്കൂൾ കലോത്സവത്തിൽ ചിത്രരചനയ്ക്ക് എ ഗ്രേഡോടെയാണ് ഒന്നാം സ്ഥാനം നേടിയത്. ഭാര്യ ഷൈനി, മക്കളായ അനഘാ മരിയ, അനൽ മരിയ, അഖില മേരി എന്നിവരടങ്ങുന്നതാണ് കുടുംബം.

ജീവിതത്തിൽ വഴികാട്ടികളായി നാട്ടിൻപുറത്തെ സാംസ്‌കാരിക കൂട്ടായ്മകളിൽ അവസരമൊരുക്കിയ ഷാജി കരോട്ട്, ഡ്രോയിങ് അദ്ധ്യാപിക നളിനി, ചിത്രകലയിലെ ഗുരുക്കന്മാരായായ പി.ടി ഔസേപ്പച്ചൻ, ടോമി എന്നിവരോട് എക്കാലവും കടപ്പാടുണ്ടെന്ന് ബിജു പറയുന്നു.

ഓടിനടന്ന്

ചുവരെഴുത്ത്

സിനിമ ലൊക്കേഷനുകളിൽ നിന്നും ലൊക്കേഷനുകളിലേക്ക് മാറി മാറി സഞ്ചരിക്കുമ്പോഴും വീറും വാശിയും നിറഞ്ഞ പഴയകാല തിരഞ്ഞെടുപ്പ് പോരാട്ടത്തിന്റെ ഓർമ്മയിലാണ് ചിത്രകലാകാരനായ ബിജു. തിരഞ്ഞെടുപ്പിന് മാസങ്ങൾക്ക് മുമ്പേ പാർട്ടിക്കാർ മതിൽ ബുക്ക് ചെയ്ത് വെള്ളയടിക്കും. നിർദ്ദേശം കിട്ടിയാൽ സ്ഥാനാർത്ഥിയുടെ ചിഹ്നവും പേരും എഴുതാൻ തുടങ്ങും. കരാറിനാണ് ചുവരെഴുത്ത്. ഒറ്റയ്ക്ക് ഓടിയെത്തില്ലാത്തതിനാൽ സുഹൃത്തുക്കളെയും കൂട്ടിയാണ് മതിലെഴുത്ത്. ജോലി വളരെ വൃത്തിയായി ചെയ്യും, തുകയും കൃത്യമായി ലഭിക്കും. നാട്ടിലെ പ്രാദേശിക നേതാക്കൾക്ക് മാത്രമല്ല - ജനപ്രിയ നേതാക്കളായ പി.ജെ ജോസഫ്, അന്തരിച്ച പി.ടി തോമസ്, ഇന്നസെന്റ് എം.പി തുടങ്ങിയവർക്കെല്ലാം വേണ്ടി ചുവരെഴുതിയിട്ടുണ്ട്. ഇപ്പോഴും വരയ്ക്കാൻ വിളിയുണ്ട്. ആഗ്രഹമുണ്ടെങ്കിലും തിരക്കിലായതിനാൽ ബിജു സ്‌നേഹപൂർവം നിരസിക്കും. എത്ര തിരക്കുണ്ടെങ്കിലും തിരഞ്ഞെടുപ്പിൽ വോട്ട് ചെയ്യാൻ തലേ ദിവസം തന്നെ ബിജു നാട്ടിലെത്തും.