താമരശ്ശേരി ചുരം നവീകരണം;   390 മരങ്ങൾ മുറിച്ചു നീക്കും

വൈത്തിരി: താമരശ്ശേരി ചുരത്തിലെ വളവുകൾ വീതി കുട്ടി നവീകരിക്കുന്നതിന്റെ ഭാഗമായി മരങ്ങൾ മുറിച്ചു മാറ്റുന്ന പ്രവർത്തി ഇന്ന് പുനരാരംഭിക്കും. 6, 7, 8 വളവുകളിലാണ്‌ റോഡരികിലെ മരങ്ങൾ മുറിച്ച് വീതി കൂട്ടുന്നത്. കഴിഞ്ഞ ദിവസം ചുരത്തിലെ കൊടിയ വളവുകളിൽ ഒന്നായ എട്ടാം വളവിൽ 30 ഓളം മരങ്ങൾ മുറിച്ചു നീക്കി. മൂന്ന് വളവുകളിലും ആയി 393 മരങ്ങളാണ് മുറിച്ച് നീക്കാനുള്ളത്. മരങ്ങൾ മുറിച്ച് മാറ്റിയശേഷം മൂന്നു വളവുകളിലും സംരക്ഷണഭിത്തി കെട്ടിയാണ് വീതി കൂട്ടി നിർമ്മിക്കുക. ഇതിനായി 37കോടി രൂപയാണ് അനുവദിച്ചിട്ടുള്ളത്. മുറിച്ചുമാറ്റേണ്ട മരങ്ങൾ ഇതിനോടകം അടയാളപ്പെടുത്തിയിട്ടുണ്ട്. പൊതുമരാമത്ത് വകുപ്പ് ഉദ്യോഗസ്ഥരുടെ മേൽനോട്ടത്തിലാണ് മരങ്ങൾ മുറിച്ചു നീക്കുന്നത്. ഫോറസ്റ്റ് ഉദ്യോഗസ്ഥരും സ്ഥലത്തുണ്ടാകും. അടയാളപ്പെടുത്തിയ സ്ഥലത്തിന് പുറമേ നിന്നും മരങ്ങൾ മുറിക്കുന്നുണ്ടോ എന്ന് വനം വകുപ്പ് നിരീക്ഷിക്കും. സംയുക്ത പരിശോധനയുടെ അടിസ്ഥാനത്തിലാണ് മരങ്ങൾ അടയാളപ്പെടുത്തിയത്. സന്നദ്ധ പ്രവർത്തകരും മരങ്ങൾ മുറിച്ചു നീക്കുന്നതിന് സഹായികളായുണ്ട്. ഞായറാഴ്ച വാഹനത്തിരക്ക് കാരണം മരം മുറിക്കൽ നടന്നില്ല. വിനോദസഞ്ചാരികളുടെ വാഹനങ്ങൾ കൂട്ടത്തോടെ എത്തിയതാണ് മരം മുറിക്കൽ തടസ്സപ്പെടാൻ കാരണമായത്. ഡൽഹിയിലെ ചൗധരി കൺസ്ട്രക്ഷൻ കമ്പനിയാണ് വീതി കൂട്ടുന്ന പ്രവർത്തിയുടെ കരാർ ഏറ്റെടുത്തിട്ടുള്ളത്. സ്ഥിരമായി വാഹനങ്ങൾ കുടുങ്ങുന്ന വളവുകൾ കൂടി വീതി കുട്ടുന്നതോടെ ചുരത്തിലെ രൂക്ഷമായ ഗതാഗതക്കുരുക്കിന് പരിഹാരമാകും എന്നാണ് പ്രതീക്ഷ. കുറഞ്ഞത് ആറുമാസം എങ്കിലും നവീകരണ പ്രവർത്തിക്ക് സമയം എടുക്കും എന്നാണ് കണക്കാക്കുന്നത്. പ്രധാന നിർമ്മാണ പ്രവർത്തനങ്ങൾ നടക്കുമ്പോൾ കർശനമായ ഗതാഗത നിയന്ത്രണം ഏർപ്പെടുത്തിയാകും പ്രവർത്തി നടക്കുക.