ദേശീയ അവാർഡ് സമ്പ്രദായം നിർത്തണം: അടൂർ ഗോപാലകൃഷ്ണൻ

തിരുവനന്തപുരം: ദേശീയ അവാർഡ് സമ്പ്രദായം വേണ്ടെന്നു വയ്ക്കുന്നതാണ് നല്ലതെന്ന് സംവിധായകൻ അടൂർ ഗോപാലകൃഷ്ണൻ. കുറച്ച് നാളുകളായി മോശം സിനിമകൾക്കാണ് ദേശീയ അവാർഡുകൾ ലഭിക്കുന്നതെന്ന് അദ്ദേഹം തിരുവനന്തപുരത്ത് പറഞ്ഞു. ജൂറിയുടെ നിലവാരം മോശമായതു കൊണ്ട് തിരഞ്ഞെടുപ്പും മോശമാകുന്നു. ഇതൊക്കെ എങ്ങനെ സംഭവിക്കുന്നുവെന്ന് അന്വേഷിക്കണം. വൈദഗ്ദ്ധ്യമുള്ള ആളുകളോ അറിയപ്പെടുന്ന ആളുകളോ അല്ല ജൂറിയിൽ ഇരിക്കുന്നത്. വേറെ പല പരിഗണനങ്ങളുമാണ് ജൂറി ഉണ്ടാകുമ്പോൾ നോക്കുന്നത്. അവരുടെ തീരുമാനങ്ങളും മറ്റുപല കാര്യങ്ങൾ നോക്കിയാണ്.

അതിനാൽ ജൂറി തീരുമാനങ്ങൾ ദുരൂഹമാണ്. അവാർഡുകളെ ജൂറിയുടെ സ്വഭാവം അനുസരിച്ചാണ് കാണേണ്ടത്. കുറച്ച് കാലമായിട്ട് ഓരോ വർഷത്തെയും മോശം സിനിമകൾക്കാണ് അവാർഡുകൾ നൽകുന്നതെന്നും അദ്ദേഹം കൂട്ടിച്ചേർത്തു.