വിഴിഞ്ഞം അക്വേറിയത്തിൽ വേട്ടക്കാരൻ മുതൽ പിക്കാസോ വരെ

വിഴിഞ്ഞം: വിഴിഞ്ഞം അക്വാറിയത്തിൽ സന്ദർശകരെ കാത്ത് പുതിയ അതിഥികളെത്തി. ഇരകളെ അടിച്ചുകൊന്നു തിന്നുന്ന പീക്കോക് മാന്റിസ് ഷ്രിമ്പ്.വ‌ർണ വിസ്മയം തീർത്ത് പിക്കാസോ ട്രിഗർഫിഷ്,കൂർത്ത പല്ലുകളുള്ള മൂറിഷ്,റെഡ്‌ടൂത്ത് ട്രിഗർഫിഷുകൾ,ചുവന്ന വാലുകളുള്ള ബട്ടർഫ്ലൈഫിഷ് എന്നിവയാണ് കാഴ്ചക്കാർക്ക് വിരുന്നൊരുക്കുന്നത്. അറബിക്കടലിന്റെ ജൈവവൈവിധ്യം പ്രദർശിപ്പിക്കുന്ന ഒരു സമുദ്ര ഗവേഷണ വിദ്യാഭ്യാസ കേന്ദ്രമായ അക്വാറിയം സന്ദർശകർക്ക് സമുദ്ര സംരക്ഷണത്തിന്റെ പ്രാധാന്യം പഠിപ്പിക്കുന്നതിനൊപ്പം കടലിന്റെ അടിത്തട്ടിലെ ആകർഷകമായ, കാഴ്ചകൾ കാണാൻ കഴിയും.

അറബിക്കടലിൽ കാണപ്പെടുന്ന വൈവിധ്യമാർന്ന നിരവധി സമുദ്രജീവികളെ അക്വേറിയത്തിൽ പ്രദർശിപ്പിക്കുന്നു. കടലാമകൾ,എയ്ഞ്ചൽ ഫിഷ്,കോമാളി മത്സ്യം,മറ്റ് വിവിധ മത്സ്യങ്ങൾ,ക്രസ്റ്റേഷ്യനുകൾ, മോളസ്കുകൾ,മറ്റ് സമുദ്രജീവികൾ എന്നിവയാൽ നിറഞ്ഞ വർണ്ണാഭമായ പവിഴപ്പുറ്റുകളും അക്വാറിയത്തിലുണ്ട്. പുതിയ അതിഥികൾ അവധി കാലത്ത് ഇവിടെ എത്തുന്ന സന്ദർശകർക്ക് കൗതുകമാകും.

പീക്കോക് മാന്റിസ് ഷ്രിമ്പ്

സമുദ്രത്തിലെ ഏറ്റവും ശക്തമായ വേട്ടക്കാരിൽ ഒന്ന്. ശരീരത്തിന് ഓറഞ്ച്,പച്ച,ചുവപ്പ്,നീല നിറങ്ങളുണ്ട്.ഏഴ് ഇഞ്ച് നീളമുള്ള ജീവിയെ നിരുപദ്രവകരമായി തോന്നുമെങ്കിലും ഇവ ഞണ്ടുകളെയും കക്കകളെയും അടിച്ചുകൊന്നു തിന്നും. വേഗതയുള്ളതും ഗ്ലാസ് തകർക്കാൻ തക്ക ശക്തിയുള്ളതുമാണ് ഇവയുടെ പ്രഹരം. ഒരു വെടിയുണ്ടയുടെ ശക്തിയിൽ പ്രഹരമേൽപ്പിക്കുന്നു,മനുഷ്യനേക്കാൾ കൂടുതൽ നിറങ്ങൾ കാണാൻ കഴിയും. അക്വാറിയത്തിലെ ടാങ്കിൽ കഴിയുന്ന ഇവയെ പ്രകോപിപ്പിച്ചാൽ ഗ്ലാസിൽ ശക്തമായി അടിച്ചു ബഹളമുണ്ടാക്കും.

പിക്കാസോ ട്രിഗർഫിഷ്

ശ്രദ്ധേയമായ വരകളുള്ള ഇവ വ്യത്യസ്ത രൂപം നൽകുന്നതിനാൽ പ്രശസ്ത ചിത്രകാരൻ പാബ്ലോ പിക്കാസോയുടെ പേരിലാണ് അറിയപ്പെടുന്നത്. മുന്നിലേക്കും പിന്നിലേക്കും സഞ്ചരിക്കാൻ കഴിയും.വായ്ക്ക് ചുറ്റും തിളക്കമുള്ള നീല വളയം.തലയുടെ മുകളിൽ നിന്ന് നീണ്ടുനിൽക്കുന്ന തിളക്കമുള്ള നീലയും കടും കറുപ്പുംവരകൾ,രാത്രി മുഴുവൻ അത് ഒരു വശം ചരിഞ്ഞ് ഉറക്കം.പരമാവധി വലിപ്പം 20സെന്റീമീറ്റർ മുതൽ ഒരു മീറ്റർ വരെ.കൂർത്ത തലകളിൽ ശക്തമായ താടിയെല്ലുകൾ ഉണ്ട്. ഇരകളെ തകർക്കാൻ ഉപയോഗിക്കുന്ന കട്ടിയുള്ള പല്ലുകൾ.

മൂറിഷ്

നേർത്തതും ആഴമുള്ളതും പുറത്തേക്ക് തള്ളിനിൽക്കുന്ന കൊക്ക് പോലുള്ള വായ,ഏകദേശം18സെന്റീമീറ്റർ നീളവും മഞ്ഞനിറത്തിലുള്ള ശരീരത്തിൽ മൂന്ന് ലംബകറുത്ത വരകൾ.ധാരാളം നീളമുള്ള കുറ്റിരോമങ്ങൾ പോലുള്ള പല്ലുകളുണ്ട്.

റെഡ്‌ടൂത്ത് ട്രിഗർഫിഷുകൾ

ആഴത്തിലുള്ള പർപ്പിൾ നിറമാണ്. തലയിൽ നീലകലർന്ന പച്ച അടയാളങ്ങളും വാൽഭാഗങ്ങളിലും ചിറകുകളിലും തിളങ്ങുന്ന ഇളം നീല അരികുകളുമുണ്ട്. ട്രിഗർഫിഷിന്റെ വായ ചിരിക്കുന്നതായി തോന്നും,മുകളിലെ താടിയെല്ലിൽ സൂചി-മൂർച്ചയുള്ള ചെറിയ ചുവന്നപല്ലുകൾ വായ അടച്ചിരിക്കുമ്പോഴും കാണാൻ കഴിയും.ഭീഷണിപ്പെടുത്തുകയും മുറുമുറുപ്പുള്ള ശബ്ദമുണ്ടാക്കാനും നിറം മാറ്റാനും കഴിയും.

ബട്ടർഫ്ലൈഫിഷ്

റെഡ്-ടെയിൽഡ് ബട്ടർഫ്ലൈഫിഷ് 18 സെന്റീമീറ്റർ വരെ നീളത്തിൽ വളരും. ചുവന്ന വാലുള്ള ചിത്രശലഭ മത്സ്യത്തിന് തവിട്ട് മുതൽ കറുപ്പ് വരെയാണ്.ഇളം ചെതുമ്പലുകൾ പുള്ളികളെപോലെ തോന്നിക്കുന്നു. കണ്ണുകൾക്ക് പിന്നിൽ ലംബമായ വെളുത്തവരയും മുകളിൽ ഇരുണ്ടവരയും മറ്റൊരു ചെറിയ വെള്ളവരയുമുണ്ട്.