സംരംഭക വർഷം സൃഷ്ടിച്ചത് 7,49,712 തൊഴിലവസരം

തിരുവനന്തപുരം: സംരംഭകവർഷം പദ്ധതിയിൽ സംസ്ഥാനത്ത് മൂന്നുവർഷത്തിൽ രജിസ്റ്റർ ചെയ്തത് 3,53,127 സംരംഭങ്ങളെന്ന് മന്ത്രി പി. രാജീവ് നിയമസഭയെ അറിയിച്ചു. 2022 ഏപ്രിൽ ഒന്നു മുതൽ 2025 മാർച്ച് 31വരെയുള്ള കണക്ക് പ്രകാരം 22,688.47 കോടിയുടെ നിക്ഷേപവും 7,49,712 പുതിയ തൊഴിലവസരങ്ങളും സൃഷ്ടിച്ചു. സൂക്ഷ്മ ചെറുകിട ഇടത്തരം സംരംഭങ്ങളുടെ മേഖലയിൽ ഉത്പാദനവും തൊഴിലും വർദ്ധിപ്പിക്കുന്നതിനുള്ള വിവിധ പദ്ധതികൾ വ്യവസായ വകുപ്പ് നടപ്പാക്കി. സംരംഭകർക്ക് അടിസ്ഥാന സൗകര്യം,വ്യവസായം തുടങ്ങാനുള്ള അനുമതികൾ സമയബന്ധിതമായി നൽകിയും കേരളത്തെ മികച്ച നിക്ഷേപ സൗഹൃദ സംസ്ഥാനമാക്കി. ദാവോസിൽ നടന്ന ലോക സാമ്പത്തിക ഫോറത്തിൽ വിവിധ രാജ്യങ്ങളുടെ പ്രതിനിധികളുമായി നടത്തിയ ചർച്ചയിൽ 27 കമ്പനികളുമായി കേരളം ധാരണാപത്രം ഒപ്പിട്ടു. മെഡിക്കൽ വ്യവസായം,റിന്യുവൽ എനർജി,ഡാറ്റാ സെന്റർ,എമർജിംഗ് ടെക്‌നോളജി എന്നീ മേഖലകളിലായി 1.15 ലക്ഷം കോടിയുടെ നിക്ഷേപമാണ് നടക്കുകയെന്ന് മന്ത്രി വ്യക്തമാക്കി.