 ചൂട് തുടങ്ങി പശുക്കളിൽ വേണം ശ്രദ്ധ,​പാലുത്പാദനം കുറയും

തിരുവനന്തപുരം:ചൂടുകാലം തുടങ്ങിയതോടെ പശുക്കളിൽ പാലുത്പാദനം കുറയാനും ആരോഗ്യപ്രശ്നങ്ങളുണ്ടാകാനും സാദ്ധ്യത.വെയിൽ കനക്കുന്നതോടെ ആവശ്യത്തിന് പച്ചപ്പുല്ല് കിട്ടാതാകുന്നത് പ്രതികൂലമായി ബാധിക്കും.ചൂട് കാരണം ശരീരസമ്മർദ്ദം കൂടുകയും പ്രതിരോധശേഷി കുറയ്ക്കുമെന്നും മൃഗസംരക്ഷണ മേഖലയിലുള്ളവർ പറയുന്നു.കിതപ്പ്,​വായിൽ നിന്ന് പത വരിക,​ഹൃദയമിടിപ്പ് ഉയരുക,​തീറ്റയെടുക്കൽ കുറയുക,​അമിത ദാഹം എന്നിവയ്ക്കും സാദ്ധ്യതയുണ്ട്.ശ്രദ്ധിച്ചില്ലെങ്കിൽ മരണം വരെയുണ്ടായേക്കാം.

രാവിലെയും വൈകിട്ടും ഖരാഹാരം/കാലിത്തീറ്റയും രാത്രിയിൽ വൈക്കോലും മാത്രമായി പരിമിതപ്പെടുത്തണം.ഡോക്ടറുടെ നിർദ്ദേശപ്രകാരം ധാതുലവണ മിശ്രിതം,​അപ്പക്കാരം,വിറ്റാമിൻ-എ,​ഉപ്പ്,​പ്രോബയോട്ടിക്‌സ് എന്നിവ തീറ്റയിൽ ഉൾപ്പെടുത്തണം.കാലികളുടെ വേനൽക്കാല തീറ്റ ക്രമീകരണത്തിലും പരിപാലനത്തിനുമായി ബോധവത്‌കരണ ക്ലാസിന് പഞ്ചായത്ത് തലത്തിൽ ആക്ഷൻ പ്ലാൻ തയ്യാറാക്കാൻ ആലോചന തുടങ്ങി.

തൊഴുത്തിൽ വായു സഞ്ചാരം വേണം

 രാവിലെ 9 മുതൽ വൈകിട്ട് 5 വരെ തുറസായ സ്ഥലത്ത് കെട്ടരുത്

 തണുത്ത കുടിവെള്ളം ലഭ്യമാക്കണം (കറവപ്പശുക്കൾക്ക് ദിവസം 80-100 ലിറ്റർ)

 പച്ചപ്പുല്ല്,​ഈർക്കിൽ മാറ്റിയ പച്ചഓല,​പനയോല എന്നിവ നൽകണം

 വായു സഞ്ചാരമുള്ള തൊഴുത്തും ഫാനും നിർബന്ധം

 മേൽക്കൂരയ്ക്ക് മുകളിൽ പച്ചക്കറി പന്തലോ നനച്ച ചാക്കോ ഇടണം