'കലാപീഠത്തിൻ്റെ പങ്ക് സ്തുത്യർഹ്യം'

പെരിങ്ങോട്ടുകര: കുട്ടികളിലെ കലാപഠന സംസ്കാരത്തിൽ കലാപീഠത്തിൻ്റെ പങ്ക് സ്തുത്യർഹ്യമെന്ന് കാലടി ശങ്കരാചാര്യ സംസ്കൃത സർവകലാശാല വൈസ് ചാൻസലർ ഡോ. കെ.കെ.ഗീതാകുമാരി. സുകുമാരകലകളുടെ സൗജന്യ പഠന കേന്ദ്രമായ ദേവസ്ഥാനം കലാപീഠത്തിലെ കുട്ടികൾക്ക് കലാപഠനത്തിൽ ഡിപ്ലോമ നൽകുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അവർ. ബി.എസ്.എസ് കൾച്ചറൽ മിഷൻ നടത്തുന്ന ശാസ്ത്രീയ സംഗീതം, ഭരതനാട്യം, ക്ലാസിക്കൽ വയലിൻ, മൃദംഗം, ചെണ്ട എന്നീ വിഭാഗങ്ങളിലെ വിദ്യാർത്ഥികൾക്കുള്ള സമാദരണച്ചടങ്ങാണ് നടന്നത്. ദേവസ്ഥാനാധിപതിയും കലാപീഠം ചെയർമാനുമായ ഡോ. ഉണ്ണി ദാമോദര സ്വാമിയുടെ മകൾ ഉണ്ണിമായ അദ്ധ്യക്ഷയായി. സർട്ടിഫിക്കറ്റ് ദാനം വൈസ് ചാൻസലർ നിർവഹിച്ചു. പൊതുവിദ്യാഭ്യാസ വകുപ്പ് ഭാരതീയ ഭാഷാസമിതി അംഗം ഡോ. എം.വി.നടേശൻ മുഖ്യപ്രഭാഷണം നടത്തി. കൾച്ചറൽ മിഷൻ ദേശീയ കോർഡിനേറ്റർ ബാലൻ മച്ചാത്ത്, സെക്രട്ടറി കെ.ജി.ബാബുരാജ്, പ്രിൻസിപ്പൽ ഡോ. പൂർണത്രയീ ജയപ്രകാശ് ശർമ്മ, പി.കെ.മനോജ് കുമാർ എന്നിവർ പ്രസംഗിച്ചു.