പ്രഖ്യാപനത്തിന് മുമ്പ് പ്രചാരണപ്പൂരം

കോട്ടയം: പ്രഖ്യാപനം വന്നില്ലെങ്കിലും ഔദ്യോഗിക തിരഞ്ഞെടുപ്പ് പൂരത്തിന് വൈക്കത്ത് തിരികൊളുത്തി. വൈക്കത്ത് ചുവരുകളിൽ സ്ഥാനാർത്ഥി പി.പ്രദീപിന്റെ പേരും ചിത്രവും കൂടി ചേർത്തപ്പോൾ മറ്റ് മണ്ഡലങ്ങളിൽ സിറ്റിംഗ് എം.എൽ.എമാർ കളംനിറഞ്ഞു. സീറ്റ് വിഭജനം പൂർത്തിയാകാത്ത മണ്ഡലങ്ങളിൽ ചുവര് ബുക്ക് ചെയ്ത് പാർട്ടികളും.

മന്ത്രി വി.എൻ.വാസവൻ,​ തിരുവഞ്ചൂർ രാധാകൃഷ്ണൻ,​ ചാണ്ടി ഉമ്മൻ,​ മോൻസ് ജോസഫ്,​ മാണി സി.കാപ്പൻ,​ എൻ.ജയരാജ്. സെബാസ്റ്റ്യൻ കുളത്തുങ്കൽ എന്നിവർ കളംനിറ‌ഞ്ഞു കഴിഞ്ഞു. കടുത്തുരുത്തിയിലും പാലായിലും ആര് മത്സരിക്കുമെന്നത് സംബന്ധിച്ച് കേരളാ കോൺഗ്രസിൽ (എം)​ ഔദ്യോഗിക തീരുമാനം വന്നിട്ടില്ല. ജോസഫ് ഗ്രൂപ്പുമായുള്ള സീറ്റ് ചർച്ച പൂർത്തിയായാൽ ഉടൻ ഏറ്റുമാനൂർ,​ ചങ്ങനാശേരി, വൈക്കം,​ കാഞ്ഞിരപ്പള്ളി,​ പൂഞ്ഞാർ സീറ്റുകളിൽ യു.ഡി.എഫ് സ്ഥാനാർത്ഥികളും പ്രചാരണത്തിനിറങ്ങും.

സീറ്റ് തർക്കം തടസമായി

മറ്റ് ജില്ലകളിലെ സ്ഥാനാർത്ഥികളുടെ കാര്യത്തിൽ കോൺഗ്രസിൽ തീരുമാനമായപ്പോൾ,​ ഏറ്റുമാനൂർ,​ ചങ്ങനാശേരി സീറ്റുകൾ ഏറ്റെടുക്കുന്നതുമായി ബന്ധപ്പെട്ട തർക്കമാണ് സ്ഥാനാർത്ഥി പ്രഖ്യാപനത്തിലെ തടസം. ഏറ്റെടുത്തോ വിട്ടുകൊടുത്തോ അതിവേഗം തീരുമാനമെടുക്കാനാണ് പാർട്ടി നേതൃത്വത്തിന്റെ ശ്രമം. ഏറ്റുമാനൂർ കോൺഗ്രസ് ഏറ്റെടുക്കാനുള്ള നീക്കമാണ് അണിയറയിൽ നടക്കുന്നത്.

കളത്തിലിറങ്ങി സി.പി.എം

പുതുപ്പള്ളിയിൽ കെ.എം.രാധാകൃഷ്ണനും കോട്ടയത്ത് അഡ്വ.കെ.അനിൽകുമാറും മത്സരിക്കുമെന്ന് ഉറപ്പായതോടെ ഇരുവരും അനൗദ്യോഗിക പ്രചാരണം തുടങ്ങി. ഏറ്റുമാനൂർ,​ കോട്ടയം,​ പുതുപ്പള്ളി മണ്ഡലങ്ങളിലെ തിരഞ്ഞെടുപ്പ് പ്രവർത്തനങ്ങൾ ഊർജ്ജിതമായി. പാലായിൽ ജോസ് കെ.മാണി മത്സരിക്കുമെന്ന് ഉറപ്പായെങ്കിലും ഔദ്യോഗികമായി പ്രഖ്യാപിച്ചിട്ടില്ല. കടുത്തുരുത്തിയിലും ഔദ്യോഗിക പ്രഖ്യാപനമുണ്ടായിട്ടില്ല.

സീറ്റ് ചർച്ച പൂർത്തിയാവാതെ എൻ.ഡി.എ

പൂഞ്ഞാർ സീറ്റ് ബി.ഡി.ജെ.എസിൽ നിന്ന് ഏറ്റെടുക്കാൻ ബി.ജെ.പി തീരുമാനിച്ചു. കെ.അജിത്തിന്റെ വരവോടെ വൈക്കം സീറ്റും ബി.ജെ.പി ലക്ഷ്യം വയ്ക്കുന്നു. ഈ സാഹചര്യത്തിൽ പകരം ഏതൊക്കെ സീറ്റുകൾ വിട്ടുകൊടുക്കും എന്നത് സംബന്ധിച്ച് അന്തിമതീരുമാനമായില്ല. കടുത്തുരുത്തി,​ കോട്ടയം സീറ്റുകളാണ് ബി.ഡി.ജെ.എസ് ആവശ്യപ്പെട്ടിരിക്കുന്നത്. പാലായിൽ ഷോൺ ജോർജ് സജീവമായി. പൂഞ്ഞാറിൽ ചുവരെഴുത്ത് നടത്തിയെങ്കിലും സ്ഥാനാർത്ഥിയാരെന്നത് സംബന്ധിച്ച് അന്തിമ തീരുമാനമായിട്ടില്ല. കാഞ്ഞിരപ്പള്ളിയിലും സ്ഥാനാർത്ഥിയെ പ്രഖ്യാപിച്ചിട്ടില്ലെങ്കിലും എൻ.ഡി.എയുടെ ഓഫീസ് കഴിഞ്ഞദിവസം തുറന്നു.