കൊവിഡ് എങ്ങും പോകില്ല, ഇവിടെത്തന്നെയുണ്ടാകും: മുന്നറിയിപ്പുമായി ലോകാരോഗ്യസംഘടന

ന്യൂയോർക്ക്​: കൊവിഡ്​-19 എച്ച്​.ഐ.വിയെ പോലെ പകർച്ചവ്യാധിയായി മാറുമെന്ന മുന്നറിയിപ്പുമായി ലോകാരോഗ്യ സംഘടന. ചില രാജ്യങ്ങൾ ലോക്​ഡൗണിൽ ഇളവുകൾ പ്രഖ്യാപിച്ച സാഹചര്യത്തിലാണ്​ ലോകാരോഗ്യ സംഘടനയുടെ മുന്നറിയിപ്പ്​.

കൊവിഡിനെ ഭൂമുഖത്തുനിന്ന്​ പൂർണമായി തുടച്ചുമാറ്റാനാവില്ല. ജനം അതിനൊപ്പം ജീവിക്കാൻ ശീലിച്ചു തുടങ്ങും. എച്ച്​.ഐ.വി നമുക്ക്​ ഇല്ലാതാക്കാനായിട്ടില്ല. നാം അതിനൊപ്പം ജീവിക്കാൻ ശീലിച്ചു. വൈറസ്​ ഭൂമുഖത്തുനിന്ന്​ എപ്പോൾ ഇല്ലാതാകുമെന്ന്​ ആർക്കും പ്രവചിക്കാനാകില്ല. ഒരു ദീർഘകാല പ്രശ്​നമായി അത്​ നമ്മുടെ കൂടെ കാണും. -ഡബ്ല്യു.എച്ച്​.ഒ വിദഗ്​ധൻ മൈക്​ റയാൻ പറഞ്ഞു. അതേസമയം, കൂട്ടായ പരിശ്രമങ്ങളിലൂടെ വൈറസിനെ നിയന്ത്രിക്കാൻ നമുക്ക്​ സാധിക്കും. കൊവിഡിനെതിരെ ലോകവ്യാപകമായി നൂറിലേറെ വാക്​സിനുകളാണ്​ വികസിപ്പിക്കുന്നത്​. ചിലതെല്ലാം ക്ലിനിക്കൽ ട്രയലിലുമാണ്​. എന്നാൽ ഏറ്റവും ഫലപ്രദമായ വാക്​സിൻ കണ്ടുപിടിക്കാനാകുമോ എന്ന കാര്യത്തിൽ വിദഗ്​ധർ പോലും സംശയിച്ചുനിൽക്കുകയാണ്​.

മീസിൽസ്​ പോലുള്ള രോഗത്തിന്​ നാം വാക്​സിൻ കണ്ടുപിടിച്ചു. എന്നാൽ ആ രോഗം പൂർണമായി തുടച്ചുമാറ്റാൻ സാധിച്ചിട്ടില്ല. വൈറസിനു മേൽ പരമാവധി ആധിപത്യം നേടാൻ സാധിച്ചാലേ ഭീതി കുറച്ചെങ്കിലും ഒഴിവാകൂ എന്നും റയാൻ ചൂണ്ടിക്കാട്ടി. വൈറസ്​ വ്യാപനം തടയാൻ എല്ലാവരുടെയും പിന്തുണ വേണമെന്ന്​ ഡബ്ല്യു.എച്ച്​.ഒ ഡയറക്​ടർ ജനറൽ ടെഡ്രോസ്​ അദാനോം ഗെബ്രിയേസൂസും​ അഭിപ്രായപ്പെട്ടു. അതേസമയം, 300,000 ലേറെ പേർ ഇതുവരെ കൊവിഡ് ബാധിച്ച് ലോകത്ത് മരിക്കുകയും 43 ലക്ഷത്തിലേറെപ്പേർക്ക് രോഗം സ്ഥിരീകരിക്കുകയും ചെയ്തിട്ടുണ്ട്.