സഹോദരന് കൊവിഡ്, സൗരവ് ഗാംഗുലി ക്വാറന്റൈനിൽ

കൊൽക്കത്ത: സഹോദരന് കൊവിഡ് സ്ഥിരീകരിച്ചതിനെ തുടർന്ന് ബി സി സി ഐ പ്രസിഡന്റ് സൗരവ് ഗാംഗുലി ക്വാറന്റൈനിലായി. വീട്ടിൽ തന്നെയാണ് അദ്ദേഹം നിരീക്ഷണത്തിൽ കഴിയുന്നത്. മറ്റുകുടുംബാംഗങ്ങളും ക്വാറന്റൈനിലാണ്.

ഗാംഗുലിയുടെ മൂത്ത സഹോദരനും ബംഗാൾ ക്രിക്കറ്റ് അസോസിയേഷൻ ജോയിന്റ് സെക്രട്ടറിയുമായ സ്‌നേഹാഷിഷ് ഗാംഗുലിക്കാണ് രോഗം സ്ഥിരീകരിച്ചത്. ഇദ്ദേഹം ഇപ്പോൾ കൊൽക്കത്തയിലെ ബെല്ലെ വ്യൂ ആശുപത്രിയിൽ ചികിത്സയിലാണ്. ഈ മാസം എട്ടിനായിരുന്നു സൗരവ് ഗാംഗുലിയുടെ നാൽപ്പത്തെട്ടാം ജന്മദിനാഘോഷം. ഗാംഗുലിയുടെ വീട്ടിൽ നടന്ന ആഘോഷത്തിൽ സ്‌നേഹാഷിഷും പങ്കെടുത്തിരുന്നു.

കുറച്ചുദിവസങ്ങളായി സ്‌നേഹാഷിന് നേരിയ പനിയുണ്ടായിരുന്നു. തുടർന്ന് നടത്തിയ പരിശോധനയിലാണ് രോഗം സ്ഥിരീകരിച്ചത്. ബംഗാൾ ക്രിക്കറ്റ് അസോസിയേഷനാണ് കൊവിഡ് സ്ഥിരീകരിച്ച വിവരം പുറത്തുവിട്ടത്.