കണ്ണൂർ:സർക്കാർ സേവനങ്ങൾ കൂടുതൽ മികവുറ്റതാക്കാൻ സംസ്ഥാന സർക്കാർ ആവിഷ്ക്കരിച്ച എന്റെ ജില്ല മൊബൈൽ ആപ്ലിക്കേഷനിൽ വിവിധ വകുപ്പുകളുടെയും ഓഫീസുകളുടേയും സേവനവും പ്രകടനവും വിലയിരുത്തി ജനം. കഴിഞ്ഞ 27 ന് നിലവിൽ വന്ന ആപ്പിലൂടെ പൊലീസ് , റോഡ് ട്രാൻസ്പോർട്ട് , കെ.എസ്.ഇ.ബി ,ആരോഗ്യം തുടങ്ങിയ വിവിധ വകുപ്പുകളെ വിമർശിച്ചും അഭിനന്ദിച്ചും നിരവധി കമന്റുകളാണ് രേഖപ്പെടുത്തിയിരിക്കുന്നത്.
കൂട്ടത്തിൽ ജില്ലയിൽ ഏറ്റവും കൂടുതൽ വിമർശനം ഏറ്റുവാങ്ങിയിരിക്കുന്നത് കണ്ണൂരിലെ റോഡ് ട്രാൻസ്പോർട്ട് വകുപ്പിനെതിരെയാണ്. ഈ ഓഫീസുകളിൽ ഏജന്റ് വഴി പോയാൽ മാത്രമെ കാര്യങ്ങൾ നടക്കു ,നേരിട്ട് പോയാൽ വളരെ മോശം അനുഭവമെന്നാണ് ഒരാളുടെ കമന്റ് .ഏജന്റുമാർക്കെതിരെ നിരവധി പേരാണ് വിമർശനമുന്നയിച്ചിരിക്കുന്നത്. .കമന്റ് എഴുതിയ ആളുടെ പേരും പോസ്റ്റ് ചെയ്ത ഡേറ്റും ആപ്പിൽ ലഭ്യമാണ്.
കണ്ണൂർ ടൗൺ പൊലീസ് സ്റ്റേഷനെ കുറിച്ച് ആകെ വന്ന കമന്റ് വളരെ മോശം സർവ്വീസ് എന്നാണ്. എന്നാൽ സിറ്റി പൊലീസ് സ്റ്റേഷന് ഗുഡ് സർട്ടിഫിക്കറ്റാണ് ലഭിച്ചിരിക്കുന്നത്. വളരെ നല്ല ഉദ്യോഗസ്ഥരാമെന്നും എല്ലാവരോടും നല്ല രീതിയിൽ പെരുമാറുന്നുമെന്നുമാണ് സിറ്റി പൊലീസ് സ്റ്റേഷനെ കുറിച്ചുള്ള ഒരു കമന്റ്.ഉദ്യോഗസ്ഥരുടെ മോശം പെരുമാറ്റമാണെന്നും ഒരൊറ്റ ആവശ്യത്തിന് വേണ്ടി നിരവധി തവണ വരേണ്ടി വരുന്നുവെന്നാണ് തലശ്ശേരി ആർ.ടി.ഒയ്ക്കെതിരെ വന്ന കമന്റ്.വിവിധ വകുപ്പുമായി ബന്ധപ്പെട്ട സംശയങ്ങളും പലരും ആപ്പിൽ രേഖപ്പെടുത്തുന്നുണ്ട്.മൃഗസംരക്ഷണവകുപ്പിന് കീഴിൽ അടിയന്തിരമായി പരിഗണിക്കേണ്ട വിഷയങ്ങളും ചിലർ ചൂണ്ടിക്കാട്ടിയിട്ടുണ്ട്. ആധുനിക സൗകര്യങ്ങളോടെ മൃഗങ്ങളെ പരിശോധിക്കാൻ സ്ഥലം സജ്ജമാക്കണം,വെറ്റിനറി മ്യൂസിയം,ഫാമുകളുടെ ഉൽപ്പനവിപണന കേന്ദ്രം, മെഡിക്കൽ ഷോപ്പ് എന്നിവയ്ക്കായുള്ള ആവശ്യവും ജില്ലാ വെറ്റിനറി സെന്ററിന് മുന്നിൽ ചിലർ വച്ചിട്ടുണ്ട്.
ഉദ്യോഗസ്ഥർക്ക് തല്ലും തലോടലും
കണ്ണൂർ സൗത്ത് ബസാർ ഡിവിഷൻ ഹെൽത്ത് ഇൻസ്പെക്ടർ കൃത്യമായി കാര്യങ്ങൾ പറഞ്ഞുതന്നുവെന്നാണ് കണ്ണൂർ കോർപ്പറേഷന് കീഴിൽ വന്ന ഒരു കമന്റ്.ഇത്തരത്തിൽ വിവിധ വകുപ്പുകളിലെ ഉദ്യോഗസ്ഥരുടെ പേര് ഉൾപ്പെടെ വച്ചാണ് ആളുകൾ കമന്റ് രേഖപ്പെടുത്തിയിരിക്കുന്നത്.ഉദ്യോഗസ്ഥർക്കതിരെ രൂക്ഷ വിമർശനവും കുറവല്ല.അതുകൊണ്ട് തന്നെ സർക്കാർ ഒാഫീസുകളിൽ നിന്നും പൊതുജനങ്ങൾ നേരിടേണ്ടി വരുന്ന പ്രശ്നങ്ങൾക്ക് ഒരു പരിധി വരെ 'എന്റെ ജില്ല' ആപ്പ് പരിഹാരമാകുമെന്നാണ് പൊതു ജനങ്ങളുടെയും അഭിപ്രായം. ഗൂഗിൾ പ്ലേ സ്റ്റോറിൽ ആപ്പ് ലഭ്യമാണ്.
'പരസ്യ അഭിപ്രായത്തിൽ പ്രകടനം നന്നാകും"
ആപ്പിൽ രേഖപ്പെടുത്തുന്ന അവലോകനം പരസ്യമായതിനാൽ അഭിപ്രായങ്ങൾ നല്ല പ്രകടനം നടത്തുന്നവർക്ക് പ്രചോദനമാകുമെന്നാണ് സർക്കാരിന്റെ പ്രതീക്ഷ.പൊതു ജനങ്ങളോടുള്ള ഉദ്യോഗസ്ഥരുടെ പെരുമാറ്റവും കണ്ടെത്താം. അവലോകനങ്ങൾ നിരീക്ഷിക്കാൻ ജില്ലാ കളക്ടർമാർക്ക് നിർദേശം നൽകിയിട്ടുണ്ട്. മൊബൈൽ നമ്പർ ഉപയോഗിച്ച് രജിസ്റ്റർ ചെയ്ത് പൊത സേവനങ്ങളുമായി ബന്ധപ്പെടാനും അവലോകനം ചെയ്യാനും കഴിയും. ഒന്ന് മുതൽ അഞ്ചു വരെ റേറ്റിംഗ് നൽകാനും സാധിക്കും.അതെ സമയംകൂടുതൽ ആളുകളിൽ ആപ്പിന്റെ ഉപയോഗം ഇപ്പോൾ എത്തിയിട്ടില്ല.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |