സ്ഥാനങ്ങൾ ഒന്നും ചോദിച്ചിട്ടില്ല തരാമെന്ന് പറഞ്ഞിട്ടുമില്ല, വാർത്ത നൽകി അപമാനിക്കരുതെന്ന് ചെന്നിത്തല

തിരുവനന്തപുരം: താൻ എ ഐ സി സിയിൽ സ്ഥാനമൊന്നും ആവശ്യപ്പെട്ടിട്ടില്ലെന്ന് വ്യക്തമാക്കി മുൻ പ്രതിപക്ഷ നേതാവ് രമേശ് ചെന്നിത്തല. 'സ്ഥാനം ചോദിച്ചിട്ടുമില്ല, തരാമെന്ന് ആരും പറഞ്ഞിട്ടുമില്ല.കോൺഗ്രസിൽ പ്രവർത്തിക്കാൻ സ്ഥാനം വേണ്ട. അങ്ങനെ പ്രവർത്തിക്കാൻ ഒരു ബുദ്ധിമുട്ടും ഇല്ല. സ്ഥാനം കിട്ടാന്‍ പോകുന്നുവെന്ന വാര്‍ത്ത നല്‍കി അപമാനിക്കരുത് - ചെന്നിത്തല പറഞ്ഞു. നിയമസഭാ കൈയാങ്കളി കേസില്‍ സ്പെഷ്യൽ പബ്ളിക് പ്രോസിക്യൂട്ടര്‍ എന്ന ആവശ്യവുമായി മുന്നോട്ട് പോകുമെന്നും അദ്ദേഹം വ്യക്തമാക്കി.

എ ഐ സി സി പുനസംഘടനയില്‍ ചെന്നിത്തലയെ ദേശീയ നേതൃത്വത്തിലേക്ക് കൊണ്ടുവരുമെന്ന് നേരത്തേ വാർത്തകളുണ്ടായിരുന്നു. എന്നാൽ ഡി സി സി പുനസംഘടനയുമായി ബന്ധപ്പെട്ട തീരുമാനങ്ങളിലെ അതൃപ്തി ചെന്നിത്തല പരസ്യമായി തുറന്നുപറഞ്ഞതോടെ ഇതിനുള്ള സാദ്ധ്യതയ്ക്ക് മങ്ങലേറ്റു എന്നാണ് കോൺഗ്രസ് കേന്ദ്രങ്ങൾ ഇപ്പോൾ നൽകുന്ന സൂചന . പ്രായാധിക്യത്തിന്റെയും അനാരോഗ്യത്തിന്റെയും പേരുപറഞ്ഞ് ഉമ്മൻ ചാണ്ടിയെ ജനറല്‍ സെക്രട്ടറി പദവിയില്‍ നിന്ന് ഒഴിവാക്കിയേക്കും എന്നും മുൻ കെ പി സി സി പ്രസിഡന്റ് മുല്ലപ്പള്ളി രാമചന്ദ്രനെ ജനറല്‍ സെക്രട്ടറി സ്ഥാനത്തേക്ക് പരിഗണിച്ചേക്കുമെന്നും കേൾക്കുന്നുണ്ട്.