മണ്ണാർക്കാട്: സഹകരണ വാരാഘോഷത്തോടനുബന്ധിച്ച് കോഴിക്കോട് നടന്ന സമാപന സമ്മേളനത്തിൽ 2019-2020 വർഷത്തെ വിദ്യാഭ്യാസ മേഖലയിലെ മികച്ച പ്രവർത്തനങ്ങൾ പരിഗണിച്ച് മണ്ണാർക്കാട് കോ-ഓപ്പറേറ്റീവ് എജ്യുക്കേഷണൽ സൊസൈറ്റിക്ക് ലഭിച്ച പുരസ്‌കാരവും കാഷ് അവാർഡും മന്ത്രി വി.എൻ.വാസവനിൽ നിന്ന് ഡയറക്ടർ അഡ്വ. കെ.സുരേഷ്, സെക്രട്ടറി എം.മനോജ് എന്നിവർ ചേർന്ന് ഏറ്റുവാങ്ങി. വിദ്യാഭ്യാസരംഗത്ത് സംഘം നടത്തി വരുന്ന മാതൃകാപരമായ പ്രവർത്തനങ്ങളാണ് അവാർഡിന് അർഹമാക്കിയത്. സംഘത്തിനു കീഴിൽ കാലിക്കറ്റ് യൂണിവേഴ്സിറ്റിയുടെ അഫിലിയേഷനോടു കൂടിയ പാലക്കാട് ജില്ലയിലെ ഏക സഹകരണ കോളേജായ യൂണിവേഴ്സൽ കോളേജ് ഒഫ് ആർട്സ് ആൻഡ് സയൻസ് ഉൾപ്പെടെ ആറ് വിദ്യാഭ്യാസ സ്ഥാപനങ്ങൾ മികച്ച രീതിയിൽ പ്രവർത്തിച്ചു വരുന്നു. പി.കെ.ശശി ചെയർമാനും ഡോ. കെ.എ.കമ്മാപ്പ വൈസ് ചെയർമാനുമായ ഭരണസമിതിയാണ് ഈ ജനകീയ വിദ്യാഭ്യാസ സംരംഭത്തിന് നേതൃത്വം നൽകി വരുന്നത്.