കൊല്ലം : കശുഅണ്ടി തൊഴിലാളികളുടെ അവകാശ സമരങ്ങൾക്ക് ഐക്യദാർഢ്യം പ്രകടിപ്പിച്ച് ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ 6ന് ചിന്നക്കടയിൽ ഏകദിന ഉപവാസ സമരം നടത്തുമെന്ന് ഡി.സി.സി പ്രസിഡന്റ് പി.രാജേന്ദ്രപ്രസാദ് അറിയിച്ചു. കോർപ്പറേഷൻ ഫാക്ടറികളിൽ തൊഴിൽ ദിനങ്ങൾ ഇല്ലാതായിരിക്കുന്നു. തൊഴിലാളികൾക്ക് ഇ. എസ്. ഐ ആനുകൂല്യങ്ങൾ നഷ്ടപ്പെട്ടിരിക്കുന്നു. കൂലി വർദ്ധനവിനുള്ള കാലവധി കഴിഞ്ഞിട്ടും സർക്കാർ അനങ്ങുന്നില്ല. കയർ മേഖലയിൽ ഒരിക്കൽ നടപ്പാക്കിയതുപോലെ ഇൻകം സപ്പോർട്ടിംഗ് സ്‌കീം നടപ്പിലാക്കണം തുടങ്ങിയ ആവശ്യങ്ങളാണ് തൊഴിലാളികൾ ഉന്നയിക്കുന്നത്. സ്വകാര്യ കശുഅണ്ടി തൊഴിലാളികളുടെ ന്യായമായ ആവശ്യങ്ങൾ ഉന്നയിച്ചുള്ള സമരത്തിന് ജില്ലാ കോൺഗ്രസ് കമ്മിറ്റി എല്ലാ പിന്തുണയും പ്രഖ്യാപിക്കുന്നതായും അദ്ദേഹം അറിയിച്ചു.