ക്രിസ്‌മ‌സ് തലേന്ന് പള്ളിയിൽ ദേശീയഗാനം ആലപിച്ച് ക്വയർ സംഘം,​ ശ്രദ്ധനേടി വീഡിയോ

മുംബയ്: വിശ്വാസികളും ജനങ്ങളും ക്രിസ്‌മസിനെ വരവേൽക്കാൻ ഒരുങ്ങുകയാണ്. വീടുകളിലും ഓഫീസുകളിലും സ്‌കൂളുകളിലും ജനങ്ങൾ‌ മികവോടെ ഇതിനകം ക്രിസ്‌മസിനായി ഒരുക്കിക്കഴിഞ്ഞു. പ്രാർത്ഥനകളുമായി ക്രിസ്‌ത്യൻ ആരാധനാലയങ്ങളും തയ്യാറെടുത്തുകഴിഞ്ഞു. ഇതിനിടെ പള്ളിയിൽ ദേശീയഗാനം ആലപിക്കുന്ന ഒരു വീഡിയോ ഇപ്പോൾ സമൂഹമാദ്ധ്യമങ്ങളിൽ ശ്രദ്ധ നേടുകയാണ്. മുംബയിലെ സെന്റ് തോമസ് കത്തീഡ്രലിലാണ് ഇവിടുത്തെ ക്വയർസംഘം ദേശീയഗാനം ആലപിച്ചത്.

300 വർഷത്തിലേറെ പഴക്കമുള്ള ദേവാലയമാണ് സെന്റ് തോമസ് കത്തീഡ്രൽ. സംഗീതത്തിന് ഏറെ പ്രാധാന്യം നൽകുന്ന ദേവാലയമാണിത്. വീഡിയോയ്‌ക്ക് സമൂഹമാദ്ധ്യമങ്ങളിൽ വലിയ പ്രചാരം ലഭിക്കുന്നുണ്ട്. 'ഇതാണ് ഇന്ത്യ. ഇത്തരത്തിലാണ് എല്ലാ വിഭാഗക്കാരും രാജ്യത്ത് ഒത്തൊരുമയോടെ സമാധാനത്തോടെ കഴിയുന്നത്. ഹാപ്പി ക്രിസ്‌മസ്', 'ആരാധനാലയത്തിൽ ദേശീയഗാനം ആലപിക്കുന്നതിൽ തെറ്റൊന്നുമില്ല' എന്നും കമന്റുകളുണ്ട്. നിരവധിപേരാണ് ഇത്തരത്തിൽ ക്വയറിന്റെ ആലാപനത്തെ പ്രശംസിച്ചിരിക്കുന്നത്. മുൻപ് മാനന്തവാടിയിലെ അമലോൽഭവ മാതാ ദേവാലയത്തിൽ ദേശീയഗാനം ലൈറ്റ്‌ ഷോയുടെ ഭാഗമായി അവതരിപ്പിച്ചത് ഏറെ ശ്രദ്ധ നേടിയിരുന്നു.