കൊച്ചി: ഇന്ത്യൻ ആഡംബരവാഹന വിപണിയിൽ കഴിഞ്ഞ എട്ടുവർഷത്തോളമായി വില്പനയിൽ ഒന്നാമതുള്ളത് പ്രമുഖ ജർമ്മൻ ബ്രാൻഡായ മെഴ്‌സിഡെസ്-ബെൻസാണ്. 2022ൽ 41 ശതമാനം വർദ്ധനയുമായി 15,​822 പുത്തൻ മോഡലുകളാണ് കമ്പനി ഇന്ത്യയിൽ വിറ്റഴിച്ചത്. ഇത് റെക്കാഡാണ്.
● കേരളത്തിൽ 2022ൽ നേടിയത് 59 ശതമാനം വില്പനവർദ്ധനയാണ്. ആഡംബരശ്രേണിയിൽ കേരളത്തിലും ഒന്നാമതുള്ള കമ്പനിക്ക്,​ സംസ്ഥാനത്തുള്ളത് 10,​000ലേറെ ഉപഭോക്താക്കളാണെന്ന് മെഴ്സിഡെസ്-ബെൻസ് ഇന്ത്യ മാനേജിംഗ് ഡയറക്‌ടറും സി.ഇ.ഒയുമായ സന്തോഷ് അയ്യർ പറഞ്ഞു. മെഴ്‌സിഡെസിന്റെ ഇന്ത്യാ മേധാവിയാകുന്ന ആദ്യ ഇന്ത്യക്കാരനും മലയാളിയുമാണ് തൃശൂർ അത്താണിക്കാരനായ സന്തോഷ് അയ്യർ.
● അടുത്ത അഞ്ചുവർഷത്തിനകം കമ്പനിയുടെ ഇന്ത്യയിലെ മൊത്തം വില്പനയുടെ 25 ശതമാനം ഇലക്‌ട്രിക് വാഹനങ്ങളാക്കുകയെന്ന ലക്ഷ്യമാണ് മുന്നിലുള്ളതെന്ന് അദ്ദേഹം പറഞ്ഞു.
● കഴിഞ്ഞവർഷത്തെ കമ്പനിയുടെ മൊത്തം വാഹനവില്പനയുടെ 3,500 യൂണിറ്റുകൾ ഒരുകോടി രൂപയ്ക്കുമേൽ വിലവരുന്ന ടോപ്പ് എൻഡ് മോഡലുകളാണ്. ഈ ശ്രേണിയുടെ വില്പന വളർച്ച 69 ശതമാനമാണ്.
● 2023ൽ മെഴ്‌സിഡെസ്-ബെൻസ് ഇന്ത്യയിൽ പുതുതായി വിപണിയിലിറക്കുക പത്ത് മോഡലുകളാണ്.