തിരുവമ്പാടി : അഗസ്ത്യൻ മൂഴി കൈതപ്പൊയിൽ റോഡിൽ സിലോൺ കടവ് പാലത്തിന് സമീപം സംരക്ഷണഭിത്തി ഏതാണ്ട് രണ്ടു വർഷമായി തകർന്ന നിലയിലാണ്. ഈ തകരാർ പരിഹരിക്കാതെയാണ് ഈ ഭാഗത്ത് റോഡ് ടാർ ചെയ്തിരിക്കുന്നത്.പാലത്തിൽ നിന്ന് ഏതാണ്ട് 15 മീറ്റർ തെക്ക് മാറി പടിഞ്ഞാറു വശത്തെ സംരക്ഷണഭിത്തിയാണ് തകർന്നു പോയത് . തറനിരപ്പിൽ നിന്ന് ഏതാണ്ട് ഒന്നര മീറ്റർ ഉയരത്തിൽ നിർമ്മിച്ചിരിക്കുന്ന കോൺക്രീറ്റ് സ്ലാബിന്റെ അടിഭാഗത്തുള്ള കരിങ്കൽ ഭിത്തിയാണ് തകർന്നത്. ഇവിടെ നിന്ന് മുകളിലേക്ക് ഏതാണ്ട് ഒന്നര മീറ്റർ ഉയരത്തിൽ കരിങ്കൽ ഭിത്തിയുടെ ഭാരം ഇപ്പോൾ ഈ കോൺക്രീറ്റ് സ്ലാബിൽ മാത്രമാണ്. ഇത് ഏതു നിമിഷവും പ്രത്യേകിച്ച് മഴക്കാലത്ത് തകരാവുന്ന അവസ്ഥയിലാണ്. സംരക്ഷണഭിത്തി തകർന്ന വിടവിലൂടെ ഉപ്പൂത്തി, പൊട്ടാമ തുടങ്ങിയ വൃക്ഷങ്ങളും വളരാൻ തുടങ്ങിയിട്ടുണ്ട്.