വരുമാനത്തിൽ സർവകാല റെക്കാഡ്: ട്രെയിൻ ടിക്കറ്റിൽ  കിട്ടിയത് 6345 കോടി

തിരുവനന്തപുരം: മാർച്ച് 31ന് അവസാനിച്ച സാമ്പത്തിക വർഷത്തിൽ ദക്ഷിണ റെയിൽവേയുടെ യാത്രാ ടിക്കറ്റ് വരുമാനം 6345കോടി രൂപ.

2019-20വർഷത്തിലെ 5225കോടി രൂപയുടെ റെക്കാഡ് തിരുത്തിയ സർവകാലനേട്ടമാണിത്. കഴിഞ്ഞതിന് തൊട്ടുമുമ്പത്തെ സാമ്പത്തിക വർഷത്തിൽ 3539.77കോടിരൂപയായിരുന്നു. 80 ശതമാനമാണ് വരുമാനവർദ്ധന.

യാത്രക്കാരുടെ എണ്ണം 33.9കോടിയിൽ നിന്ന് 64കോടിയായി ഉയർന്നു.അവധി, ഉത്സവ വേളകളിലാണ് യാത്രക്കാർ വർദ്ധിച്ചത്.

ദക്ഷിണ റെയിൽവേയുടെ മൊത്തം വരുമാനം 10703കോടിയാണ്. മുൻവർഷത്തെക്കാൾ 47 ശതമാനം ഉയർന്നു. 2022-23 സാമ്പത്തിക വർഷത്തിൽചരക്കു ഗതാഗതത്തിൽ 30 ശതമാനത്തിന്റെ വർദ്ധനയോടെ 3637.86 കോടി രൂപ നേടി. പെട്രോളിയം, ഭക്ഷ്യ വസ്തുക്കൾ, ഓട്ടോമൊബൈൽ ഉത്പന്നങ്ങൾ എന്നിവ ഉൾപ്പെടെ 37.94 ദശലക്ഷം ടൺ ചരക്ക് നീക്കം നടത്തിയതായി ദക്ഷിണ റെയിൽവേ അറിയിച്ചു.

അപകടം കുറഞ്ഞു

കഴിഞ്ഞ വർഷം ദക്ഷിണറെയിൽവേ മേഖലയിൽ കാര്യമായ അപകടങ്ങളുണ്ടായില്ല. 53 ശതമാനം ഇന്റർലോക്കിംഗും ഇലക്ട്രോണിക് സംവിധാനത്തിലേക്ക് മാറ്റിയതോടെ 92 ശതമാനം ട്രെയിനുകളും കൃത്യസമയം പാലിച്ചു. യാത്രക്കാർക്ക് നേരിട്ട് ടിക്കറ്റ് എടുക്കാനായി 239 സ്റ്റേഷനുകളിൽ വെൻഡിംഗ് മെഷീനുകൾ സ്ഥാപിച്ചിട്ടുണ്ട്. അൺറിസർവ്ഡ് ടിക്കറ്റിംഗ് സിസ്റ്റം (യു.ടി.എസ്.) ആപ്പിൽ കൂടുതൽ മാറ്റങ്ങൾ കൊണ്ടുവരുമെന്നും റെയിൽവേ അറിയിച്ചു.