കേരള ടീമിനെ അഭിനന്ദിച്ച് മുഖ്യമന്ത്രി

ന്യൂഡൽഹി: രണ്ടാമത് ദേശീയ സെറിബ്രൽ അത്‌ലറ്റിക്‌സിൽ ചാമ്പ്യൻമാരായ കേരള ടീമിനെ നേരിട്ടെത്തി അഭിന്ദിച്ച് മുഖ്യമന്ത്രി പിണറായി വിജയൻ. ഡൽഹി കേരള ഹൗസിലാണ് ചടങ്ങ് സംഘടിപ്പിച്ചത്. കേരളത്തിന്റെ വിജയത്തിൽ സന്തോഷമുണ്ടെന്നും,​കൂടുതൽ നേട്ടങ്ങൾ ഭാവിയിലും കൈവരിക്കട്ടേയെന്നും മുഖ്യമന്ത്രി ആശംസിച്ചു. ചടങ്ങിൽ മന്ത്രിമാരായ പി. രാജീവ്,​കെ. രാധാകൃഷ്‌ണൻ,സിപിഎം സംസ്ഥാന സെക്രട്ടറി എം.വി. ഗോവിന്ദൻ,​സർക്കാരിന്റെ ഡൽഹിയിലെ പ്രത്യേക പ്രതിനിധി പ്രൊഫ. കെ.വി. തോമസ് എന്നിവർ പങ്കെടുത്തു. ഡൽഹിയിലെ ജവാഹർലാൽ നെഹ്റു സ്റ്റേഡിയത്തിൽ സംഘടിപ്പിച്ച ദേശീയ അത്‌ലറ്റിക്‌സിൽ ഒരു സ്വർണവും,​ നാല് വെളളിയും ആറ് വെങ്കലവും നേടിയാണ് കേരളം ചാമ്പ്യന്മാരായത്.