ഐപിഎല്ലിൽ ലക്‌നൗ-റോയൽ ചലഞ്ചേഴ്‌സ് ബാംഗ്ളൂർ മത്സരത്തിനൊടുവിൽ ലക്‌നൗ സൂപ്പർ ജയന്റ്‌സ് മെന്റർ ഗൗതം ഗംഭീറും ബാംഗ്ളൂർ മുൻ നായകൻ വിരാട് കൊഹ്‌ലിയും തമ്മിൽ വാക്കുതർക്കത്തിലേർപ്പെട്ടത് ഏറെ ചർച്ചയായിരുന്നു. മത്സരത്തിൽ ലക്‌നൗവിന്റെ ഓരോ വിക്കറ്റ് വീഴുമ്പോഴും കൊഹ്‌ലി അത് വലിയ തോതിൽ ആഘോഷമാക്കിയിരുന്നു. ലക്‌നൗ ബൗളറായ നവീൻ ഉൾ ഹഖുമായി കൊഹ്‌ലി രൂക്ഷമായ തർക്കിക്കുകയും ചെയ്‌തിരുന്നു മത്സരത്തിൽ.

സംഭവം ഏറെ വിവാദമായതോടെ ഐപിഎൽ പെരുമാറ്റ ചട്ടം ലംഘിച്ചതിന് ഗംഭീറിനും കൊഹ്‌ലിക്കും 100 ശതമാനം മാച്ച്ഫീയും പിഴയായി ഒടുക്കേണ്ടിവന്നു. കൊഹ്‌ലിയുമായി തർക്കിച്ച നവീൻ ഉൾ ഹഖിനാകട്ടെ 50 ശതമാനം മാച്ച്ഫീയും നൽകേണ്ടി വന്നു. ഇപ്പോഴിതാ ഇരുവരുടെയും തർക്കത്തെ കളിയാക്കിക്കൊണ്ട് സമൂഹമാദ്ധ്യമങ്ങളിൽ പോസ്‌റ്റ് ചെയ്‌തിരിക്കുകയാണ് മുൻ ഇന്ത്യൻ താരം യുവരാജ് സിംഗ്.

'ധണ്ട്‌രഖ് എന്ന അവരുടെ ക്യാമ്പെയിന് വേണ്ടി സ്‌പ്രൈ‌റ്റ്, ഗൗട്ടിയും ചീക്കുവുമായി കരാർ ഒപ്പിടണമെന്ന് എനിക്കു തോന്നുന്നു. എന്ത് പറയുന്നു?' എന്ന തമാശ ചോദ്യമുന്നയിച്ചാണ് ഇരുവരെയും ടാഗ് ചെയ്‌തുള്ള യുവരാജിന്റെ പോസ്‌റ്റ്. മുൻപും ഐപിഎല്ലിൽ വച്ച് കൊഹ്‌ലിയും ഗംഭീറും തമ്മിൽ ഉരസിയിട്ടുണ്ട്. പത്ത് വർഷം മുൻപ് 2013 ഐപിഎൽ സീസണിലാണിത്. അന്ന് കൊൽക്കത്ത നൈറ്റ് റൈഡേഴ്‌സ് താരമായിരുന്നു ഗംഭീർ.

I think #Sprite should sign #Gauti and #Cheeku for their campaign #ThandRakh 🤪🥶 what say guys? 😎 @GautamGambhir @imVkohli @Sprite

— Yuvraj Singh (@YUVSTRONG12) May 4, 2023

ഇന്ത്യൻ ടീമിൽ വർഷങ്ങളോളം ഒന്നിച്ച് കളിച്ചവരാണ് ഗംഭീറും കൊഹ്‌ലിയും. ഡൽഹിയ്‌ക്ക് വേണ്ടിയും ഇവർ ഒന്നിച്ച് കളിച്ചു. എന്നാൽ ഐപിഎല്ലിൽ തമ്മിൽ തർക്കിച്ച ചരിത്രമാണ് ഇവർക്കുള്ളത്.