ശക്തരായ വനിതകളിൽ ബാർബിയും

വാ​ഷിം​ഗ്ട​ൺ​:​ ​ ഫോബ്‌സ് മാസിക തിരഞ്ഞെടുത്ത ഇക്കൊല്ലത്തെ ലോകത്തിലെ ഏറ്റവും ശക്തരായ 100 വനിതകളുടെ പട്ടികയിൽ ബാർബി പാവയും. 64 വയസുള്ള ബാർബിപ്പാവ പട്ടികയിൽ 100-ാം സ്ഥാനത്താണുള്ളത്. 2023ൽ ബാർബി ഒരു പാവ എന്നതിലുപരി സ്ത്രീശാക്തീകരണത്തിന്‍റെ പ്രതീകമായി മാറിയെന്ന് ഫോബ്‌സ് വിലയിരുത്തുന്നു. കൂടാതെ 'ബാർബി' യുടെ പേരിൽ ഇക്കൊല്ലം പുറത്തിറങ്ങിയ ഹോളിവുഡ് സിനിമയും വൻ ഹിറ്റായി. ഗ്രേറ്റ ഗർവിഗ് സംവിധാനം ചെയ്ത ബാർബി പുറത്തിറങ്ങിയതിന് പിന്നാലെ ബാർബിയുടെ ഫാഷൻ ലോകമെമ്പാടും വീണ്ടും തരംഗമായി.

100 മില്യൺ ബഡ്ജറ്റിലൊരുക്കിയ ചിത്രത്തിൽ മാർഗോ റോബി, റയാൻ ഗോസ്‌ലിംഗ് എന്നിവരാണ് കേന്ദ്ര കഥാപാത്രങ്ങളെ അവതരിപ്പിക്കുന്നത്. 1959ൽ റൂത്ത് ഹാൻഡ്‌ലർ സൃഷ്ടിച്ച ബാർബിയെ അമേരിക്കൻ പാവ നിർമ്മാതാക്കളായ മാറ്റൽ കമ്പനിയാണ് പുറത്തിറക്കുന്നത്. ടിക് ടോക്കിലും ഇൻസ്റ്റഗ്രാമിലും അഞ്ചു ദശലക്ഷവും യൂട്യൂബിൽ 12 ദശലക്ഷവും ഫോളോവേഴ്സുമായി ബാർബി ലോകത്ത് ആധിപത്യം തുടരുകയാണ്.