ട്വന്റി-20 ലോകകപ്പിൽ നിന്ന് വിരാട് കൊഹ്‌ലിയെ ഒഴിവാക്കുമെന്ന് റിപ്പോർട്ടുകൾ

മുംബയ് : ജൂണിൽ വെസ്റ്റ് ഇൻഡീസിലും അമേരിക്കയിലുമായി നടക്കുന്ന ട്വന്റി-20 ലോകകപ്പിനുള്ള ഇന്ത്യൻ ടീമിൽ നിന്ന് വിരാട് കൊഹ്‌ലിയെ ഒഴിവാക്കുമെന്ന് റിപ്പോർട്ടുകൾ. ട്വന്റി-20യിലെ വിരാടിന്റെ ബാറ്റിംഗ് ശൈലി വിൻഡീസിലെ പിച്ചുകൾക്ക് യോജിക്കുന്നതല്ലെന്നും യുവതാരങ്ങൾക്കായി വഴിമാറിക്കൊടുക്കണമെന്നും ചീഫ് സെലക്ടർ അജിത് അഗാർക്കർ വിരാടിനോട് ആവശ്യപ്പെട്ടതായി കഴിഞ്ഞ ദിവസം ഒരു ദേശീയ ദിനപത്രം റിപ്പോർട്ട് ചെയ്തിരുന്നു.

2022ലെ ട്വന്റി-20 ലോകകപ്പിൽ ഗംഭീരപ്രകടനമാണ് വിരാട് കാഴ്ചവച്ചിരുന്നത്. അതിനുശേഷം ഈ ഫോർമാറ്റിൽ നിന്ന് വിട്ടുനിന്ന വിരാട് ഈ ഫോർമാറ്റിൽ ഈ ജനുവരിയിൽ അഫ്ഗാനിസ്ഥാനെതിരെ രണ്ട് മത്സരങ്ങൾ കളിച്ചിരുന്നുവെങ്കിലും 29 റൺസ് മാത്രമാണ് നേടാനായത്. അതേസമയം ഐ.പി.എല്ലിലെ പ്രകടനത്തിന്റെ അടിസ്ഥാനത്തിലാണ് ലോകകപ്പിനുള്ള ടീം സെലക്ഷനെന്ന് ബി.സി.സി.ഐയും സെലക്ടർമാരും പറഞ്ഞിരുന്നു. ഐ.പി.എല്ലിൽ ആർ.സി.ബിക്ക് വേണ്ടി കളിക്കാനൊരുങ്ങുകയാണ് വിരാട്. ഈ അവസരത്തിൽ വിരാടിനെ ലോകകപ്പിൽ നിന്ന് ഒഴിവാക്കുമെന്നുള്ള റിപ്പോർട്ടുകൾ അസംബന്ധമാണെന്നും ശ്രുതിയുണ്ട്.