തമിഴ്നാട് പൊലീസിനെ വെട്ടിച്ച പോക്സോ പ്രതി അഞ്ചുതെങ്ങ് കോസ്റ്റൽ പൊലീസിന്റെ പിടിയിൽ

കടയ്ക്കാവൂർ: തമിഴ്നാട്ടിലെ പോക്സോ കേസ് പ്രതിയെ അഞ്ചുതെങ്ങിൽ കോസ്റ്റൽ പൊലീസ് പിടികൂടി. തമിഴ് പൊലീസിനെ വെട്ടിച്ച് കടൽ വഴി രക്ഷപ്പെട്ട പ്രതിയെയാണ് കോസ്റ്റൽ പൊലീസ് പിടികൂടിയത്. 2023- ൽ തമിഴ്നാട് വള്ളവിളയിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിലെ ജിൽസൻ (22) ആണ് കോസ്റ്റൽ പൊലീസിന്റെ സമയോചിത ഇടപെടലിലൂടെ പിടിയിലായത്. തമിഴ്നാട്ടിൽ നിന്ന് മീൻപിടിത്ത ബോട്ടിൽ രക്ഷപ്പെട്ട പ്രതി ആദ്യം കൊച്ചിഭാഗത്തേക്കാണ് കടന്നത്. പിൻതുടർന്ന തമിഴ്നാട് പൊലീസ് വിവരം കേരള കോസ്റ്റൽ പൊലീസിനെ അറിയിക്കുകയും കോസ്റ്റൽ പൊലീസ് പ്രതിയെ പിടികൂടാനായി ശക്തമായ തെരച്ചിൽ ആരംഭിക്കുകയുമായിരുന്നു. മത്സ്യബന്ധന യാനങ്ങളിലുൾപ്പെടെ ശക്തമായ തെരച്ചിൽ നടത്തിയെങ്കിലും പ്രതിയെ കണ്ടെത്താനായിരുന്നില്ല. പ്രതി സഞ്ചരിച്ചിരുന്ന വളളം വിഴിഞ്ഞത്തുനിന്ന് കണ്ടെത്തുകയും ചെയ്തിരുന്നു. വളളം ഉടമയെയും തൊഴിലാളികളെയും ചോദ്യം ചെയ്തതിൽ നിന്ന് പ്രതി അഞ്ചുതെങ്ങ് ഭാഗത്തുവച്ച് മറ്റൊരു വളളത്തിൽ കരയിലേക്ക് പോവുകയായിരുന്നു എന്ന വിവരം ലഭിച്ചിരുന്നു. ഇതേതുടർന്ന് കോസ്റ്റൽ പൊലീസ് നടത്തിയ പരിശോധനയിലാണ് പ്രതിയെ അഞ്ചുതെങ്ങ് കായിക്കര ഭാഗത്ത് കണ്ടെത്തിയത്. പ്രതിയെ തമിഴ്നാട് പൊലീസീന് കെെമാറി.