വീടുകളിൽ ഗാർഡൻ ഒരുക്കുമ്പോൾ പൂച്ചെടികൾക്കാണ് എല്ലാവരും പ്രാധാന്യം നൽകുന്നത്. ഇവയിൽ തന്നെ റോസാച്ചെടികൾക്കാണ് ആരാധകർ കൂടുതൽ. പല നിറങ്ങളിലുള്ള റോസ് ലഭിക്കുന്നതിനാൽ പൂന്തോട്ടത്തിന് ഇവ കൂടുതൽ ഭംഗി നൽകാറുണ്ട്. നഗരപ്രദേശങ്ങളിൽ വളരെ പരിമിതമായ സ്ഥലം മാത്രം ഉള്ളതിനാൽ പലരും ടെറസിലും മറ്റും ചെടികൾ നട്ടുപിടിപ്പിക്കാറാണ് പതിവ്. എന്നാൽ സ്ഥലമുണ്ടായിരുന്നാലും ഇല്ലെങ്കിലും വീടുകളിൽ അപൂർവമായി മാത്രം വളർത്തുന്ന പൂവാണ് താമര. സ്ഥലമില്ലായ്മ തന്നെയാണ് പ്രധാന കാരണം.

വീടുകളുടെ മുറ്റത്ത് ചെറുകുളങ്ങളുണ്ടാക്കി അതിലാണ് താമര വച്ചുപിടിപ്പിക്കുന്നത്. ചുരുക്കം ചില വീടുകളിൽ മാത്രമേ അതിനുള്ള സ്ഥലം ഉണ്ടാവുകയുള്ളൂ. ചിലർ വലിയ പ്ലാസ്റ്റിക് ബേസിനിലും ബക്കറ്റിലുമൊക്കെ താമര വളർത്താറുണ്ട്. എന്നാൽ സ്ഥലപരിമിതിയുണ്ടെങ്കിലും ചെറിയ വീടുകളിലും താമര വിരിയിക്കാനാകും.

താമര വിത്തുകൾ അനുകൂല സാഹചര്യങ്ങൾ ലഭിച്ചാൽ പോലും മുളയ്ക്കാത്തയിനമാണ്. അവയുടെ കട്ടിയുള്ള പുറന്തോടാണ് ഇതിനുള്ള പ്രധാന കാരണം. എത്രകാലം വെള്ളത്തിൽ കിടന്നാലും അല്പം പോലും ജലാശം ഉള്ളിൽ കടക്കില്ല. താമര വിത്തുകൾക്ക് ഓവൽ ആകൃതിയാണുള്ളത്. അതിന്റെ അറ്റം കൂർത്തിരിക്കും. ഇതിന്റെ രണ്ടുവശവും ചെറുതായി പൊട്ടിച്ചെടുക്കണം. അതിന് ശേഷം വിത്ത് ഒരു ഗ്ലാസ് വെള്ളത്തിൽ ഇട്ടുവയ്ക്കണം. വെള്ളത്തിന്റെ നിറം മാറുന്നതിന് അനുസരിച്ച് വെള്ളം മാറ്റിക്കൊടുക്കുക. കുറച്ചുദിവസങ്ങൾ കഴിയുമ്പോൾ വിത്ത് ഇരട്ടി വലുപ്പമാകും. പിന്നീട് മുളപൊട്ടി തുടങ്ങും. മുള പുറത്തേക്ക് വന്നാൽ മാത്രമേ ഇലകൾ വിരിഞ്ഞു തുടങ്ങൂ.

നാലു ഇലകൾ വരുന്നത് വരെയുള്ള ഊർജം വിത്തിനുള്ളിൽ തന്നെ ഉണ്ടാകും. ഒരു മാസം വിത്ത് വെള്ളത്തിൽ തന്നെ കിടക്കും. അതിനിടെ വേരുകൾ മുളയ്ക്കാൻ തുടങ്ങുമ്പോൾ ശ്രദ്ധയോടെ വെള്ളത്തിൽ നിന്നും എടുത്ത് മറ്റൊരു വ്യാസമുള്ള പാത്രത്തിൽ ചളി,​ ചരൽ,​ മണ്ണിര കമ്പോസ്റ്റ് എന്നിവ നിറച്ച് അതിൽ മുക്കാൽ ഭാഗം വെള്ളവുമൊഴിച്ച് മാറ്റി നടണം. ഇതിന് ശേഷമായിരിക്കും അഞ്ചാമത്തെ ഇല വരുന്നത്. തുടർന്ന് ചെടി വലുതാകുന്നതിന് അനുസരിച്ച് പാത്രവും വലുതാക്കി കൊടുക്കാം. നല്ല ഭംഗിയുള്ള താമര നമ്മുടെ വീട്ടിലും വിരിയിക്കാം,​