നെഞ്ചുവേദന അനുഭവപ്പെട്ടാൽ ഏതു ഡോക്ടറെ കാണണമെന്ന് എല്ലാവർക്കും അറിയാം. ചെവി വേദന വന്നാൽ ആരെ കാണണമെന്നും അറിയാം. പക്ഷേ, ശരീരത്തിൽ പൊള്ളലേറ്റാൽ പോകേണ്ടത് പ്ളാസ്റ്റിക് സർജന്റെയടുത്താണെന്ന് എത്ര പേർക്ക് അറിയാം? ഇന്ന് ദേശീയ പ്ളാസ്റ്റിക് സർജറി ദിനമാണ്. പ്ളാസ്റ്റിക് സർജറിയെക്കുറിച്ച് സാധാരണക്കാർക്കുള്ള സംശയങ്ങൾ അകറ്റാനുള്ള ബോധവത്കരണ ശ്രമങ്ങളാണ് ഈ ദിനത്തിലെ പ്രധാന ദൗത്യം.
പ്ളാസ്റ്റിക് സർജറി എന്നത് സൗന്ദര്യ സംവർദ്ധക ചികിത്സയുമായി മാത്രം ബന്ധപ്പെട്ടതാണെന്നാണ് പലരുടെയും ധാരണ. അതേസമയം, ഒരു പ്ളാസ്റ്റിക് സർജന്റെ ചികിത്സാ സേവനം ആവശ്യപ്പെടുന്ന പൊള്ളൽ നാട്ടിൽ സാധാരണമാണു താനും! പൊള്ളലേറ്റാൽ ആദ്യം ചെയ്യേണ്ടത് എന്തെന്നു ചോദിച്ചാൽ പത്തിൽ ഒമ്പതു പേരും പറയും, പൊള്ളലേറ്റിടത്ത് ടൂത്ത് പേസ്റ്റ് തേയ്ക്കണമെന്ന്. അവർ അതുതന്നെ ചെയ്യുകയും ചെയ്യും.
പൊള്ളലിനുള്ള പ്രാഥമിക ചികിത്സ, ശരീരത്തിൽ പൊള്ളലേറ്റ ഭാഗത്ത് പച്ചവെള്ളം തുടർച്ചയായി ഒഴിക്കുക എന്നതാണ്. ഐസ് വാട്ടർ, ടൂത്ത് പേസ്റ്റ്, തേൻ ഇവയൊന്നും പൊള്ളലേറ്റയുടൻ ആ ഭാഗത്ത് പരീക്ഷിക്കരുത്. പൊള്ളിയ ഭാഗത്ത് പച്ചവെള്ളം ഒഴിക്കുന്നതുവഴി പൊള്ളലിന്റെ ആഴം കുറയ്ക്കാൻ കഴിയും. അതിനുശേഷം വൃത്തിയുള്ള തുണി ഉപയോഗിച്ച് ആ ഭാഗം പൊതിയുക. അതിനു ശേഷം എത്രയും വേഗം അടുത്തുള്ള ആശുപത്രിയിലെത്തി വിദഗ്ദ്ധ ചികിത്സ തേടുക.
പൊള്ളലിന്റെ പ്രാഥമിക ശുശ്രൂഷ, ചികിത്സാ രീതികൾ, പൊള്ളലിന് എന്തൊക്കെ ചെയ്യാം, എന്തൊക്കെ ചെയ്തുകൂടാ എന്നിവയെക്കുറിച്ച് സ്കൂൾ വിദ്യാർത്ഥികളിൽ അവബോധം നൽകുന്നതിനായി 'ഫയർ ഫ്ളൈ" എന്ന പേരിൽ ഞങ്ങൾ പ്രോജക്ട് നടത്തുന്നുണ്ട്. ഇതിന്റെ ഭാഗമായി സ്കൂളുകളിൽ ക്വിസ് പരിപാടികളും ബോധവത്കരണ ക്ളാസുകളും മറ്റും സംഘടിപ്പിക്കുകയും ചെയ്യുന്നു.
(കൺസൾട്ടന്റ് പ്ളാസ്റ്റിക് സർജൻ, ചീഫ് കോ- ഓർഡിനേറ്റർ- 'ഫയർ ഫ്ളൈ" പ്രോജക്ട്, പി.ആർ.എസ് ആശുപത്രി, തിരുവനന്തപുരം)
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |