നടി രേഖാ നായരുടെ കാറിടിച്ച് റോഡരികിൽ കിടന്നുറങ്ങിയയാൾ മരിച്ചു; വഴിത്തിരിവായത് സിസിടിവി ദൃശ്യങ്ങൾ

ചെന്നൈ: റോഡരികെ കിടന്നുറങ്ങിയയാൾ നടി രേഖ നായരുടെ കാറിനടിയിൽപ്പെട്ട് മരിച്ചു. തമിഴ്‌നാട് സെയ്‌ദാപെട്ടിലാണ് സംഭവം. അണ്ണൈസത്യ നഗർ സ്വദേശി മഞ്ചൻ (55) ആണ് മരിച്ചത്. മദ്യലഹരിയിലായിരുന്ന ഇയാൾ ജാഫർഖാൻപെട്ടിലെ പച്ചയപപ്ൻ സ്‌ട്രീറ്റിൽ റോഡരികിൽ കിടക്കവെയാണ് അപകടമുണ്ടായതെന്ന് പൊലീസ് പറഞ്ഞു.

ഗുരുതരമായി പരിക്കേറ്റ മഞ്ചനെ ഉടൻതന്നെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. സംഭവത്തിൽ കേസെടുത്ത ഗ്വിണ്ടി പൊലീസ് സിസിടിവി ദൃശ്യങ്ങൾ പരിശോധിച്ചാണ് കാർ കണ്ടെത്തിയത്. തുടർന്ന്, ഡ്രൈവ‌ർ പാണ്ടിയെ അറസ്റ്റ് ചെയ്യുകയും കാർ പിടിച്ചെടുക്കുകയും ചെയ്‌തു. അപകടം നടക്കുമ്പോൾ രേഖ കാറിലുണ്ടായിരുന്നോ, പാണ്ടി തന്നെയാണോ വാഹനമോടിച്ചത് തുടങ്ങിയ കാര്യങ്ങൾ അന്വേഷിക്കുകയാണെന്നും പൊലീസ് പറഞ്ഞു.

എഴുത്തുകാരി കൂടിയായ രേഖ നായർ പാർഥിപൻ സംവിധാനം ചെയ്‌ത 'ഇരവിൻ നിഴൽ ' എന്ന സിനിമയിലൂടെയാണ് പ്രശസ്‌തയായത്. നിരവധി തമിഴ് സിനിമകളിലും സീരിയലുകളിലും വേഷമിട്ടിട്ടുള്ള നടി തമിഴ് ചാനലുകളിൽ അവതാരകയുമായിരുന്നു.