വിവാഹവാഗ്ദാനം നൽകി പീഡനം: യുവ സംഗീത സംവിധായകൻ അറസ്റ്റിൽ

കൊച്ചി: വിവാഹവാഗ്ദാനം നൽകി പീഡിപ്പിക്കുകയും ഈ ദൃശ്യങ്ങൾ യുവതിയുടെ കുടുംബത്തിന് കൈമാറുമെന്ന് ഭീഷണിപ്പെടുത്തുകയും ചെയ്ത കേസിൽ യുവ സംഗീത സംവിധായകൻ അറസ്റ്റിലായി. ഏറ്റുമാനൂർ സ്വദേശിയായ എറണാകുളത്ത് താമസിക്കുന്ന ശരത് മോഹനാണ് (40) അറസ്റ്റിലായത്. തിരുവനന്തപുരം സ്വദേശിനിയുടെ പരാതിയിലാണ് അറസ്റ്റ്. പാലാരിവട്ടം പൊലീസ് ഇയാളെ വൈക്കത്തുള്ള പെൺസുഹൃത്തിന്റെ വീട്ടിൽനിന്നാണ് പിടികൂടിയത്.

2023 ഒക്ടോബറിലായിരുന്നു യുവതിയെ ഇയാൾ ആദ്യമായി പീഡനത്തിന് ഇരയാക്കിയത്. തുടർന്ന് ജില്ലയിലെ വിവിധയടങ്ങളിലെത്തിച്ചും പീഡിപ്പിച്ചു. ഉപദ്രവം സഹിക്കവയ്യതായതോടെ യുവതി നാട്ടിലേക്ക് പോകാൻ തയ്യാറെടുത്തതോടെയാണ് പീഡനദൃശ്യങ്ങൾ കുടുംബത്തിന് കൈമാറുമെന്ന് ഭീഷണിപ്പെടുത്തിയത്. ശരത്ത് മർദ്ദിക്കുകയും കഴുത്തുഞെരിച്ച് ശ്വാസംമുട്ടിച്ചെന്നും യുവതി പരാതിയിൽ പറയുന്നു.

നേരത്തെ മാഹിയിൽനിന്ന് വിദേശമദ്യംകടത്തിയ കേസിലും ശരത് അറസ്റ്റിലായിട്ടുണ്ട്. 2013ൽ ജാമ്യംലഭിച്ചെങ്കിലും പിന്നീട് ഹാജരാകാതിരുന്നതോടെ വാറന്റാകുകയും 2022ൽ പയ്യോളി പൊലീസ് അറസ്റ്റ് ചെയ്യുകയുമായിരുന്നു. ഇയാൾക്കെതിരെ ജോലിതട്ടിപ്പ് പരാതിയും പൊലീസിന്റെ മുന്നിലെത്തിയിട്ടുണ്ട്. പാലാരിവട്ടം എസ്.എച്ച്.ഒയുടെ നേതൃത്വത്തിലുള്ള അന്വേഷണസംഘമാണ് പ്രതിയെ പിടികൂടിയത്.