ലക്ഷ്യം ഗൾഫ് പ്രവാസികൾ,​ പ്രമുഖ നടിമാരുമായി ബന്ധം പുലർ‌ത്താൻ അവസരം വാഗ്ദാനം ചെയ്ത് തട്ടിപ്പ്

കൊച്ചി: മലയാള സിനിമയിലെ പ്രമുഖ നടിമാരുടെ ഫോട്ടോ സോഷ്യൽ മീഡിയയിൽ പോസ്റ്റുചെയ്ത് അനാശാസ്യത്തിന് അവസരം ഒരുക്കാമെന്ന് പറഞ്ഞ് ലക്ഷങ്ങൾ തട്ടിയെടുത്ത കേസിൽ എറണാകുളം എളമക്കര പ്ളേഗ്രൗണ്ട് റോഡ് ശ്യാംമോഹൻ (37) സി​റ്റി​ സൈബർ പൊലീസി​ന്റെ പി​ടി​യി​ലായി​. രണ്ട് പ്രമുഖ നടിമാരുടെ പരാതി​യി​ലാണ് നടപടി​. ഡി​.സി​.പി കെ.എസ്. സുദർശൻ, സൈബർ എ.സി.പി എം.കെ. മുരളി എന്നിവരുടെ മേൽനോട്ടത്തി​ലായി​രുന്നു അന്വേഷണം.

ഗൾഫി​ലുള്ള മലയാളി സോഷ്യൽമീഡിയ ഗ്രൂപ്പുകളിലാണ് നടിമാരെ നൽകാമെന്ന പരസ്യങ്ങൾ പോസ്റ്റുചെയ്തത്. സമാനമായ കേസിലെ ഒരു പ്രതിയെ കഴിഞ്ഞദിവസം പാലക്കാട് അട്ടപ്പാടിയിൽനിന്ന് സൈബർപൊലീസ് അറസ്റ്റുചെയ്തി​രുന്നു.

എസ്.ഐ ശൈലേഷ്, എ.എസ്.ഐ ശ്യാം, ഡോളി, എസ്. ദീപ, സി.പി.ഒ അജിത്, ആൽഫിറ്റ് ആൻഡ്രൂസ്, ഷറഫുദ്ദീൻ എന്നിവർ അടങ്ങിയ സംഘമാണ് പ്രതിയെ അറസ്റ്റുചെയ്തത്.