കെഎസ്‌ആർടിസി ബസുകൾക്ക് കേടുപാടുകൾ വരുത്തിയത് ജീവനക്കാരാണെങ്കിൽ പിരിച്ചുവിടും; അന്വേഷണത്തിന് ഉത്തരവിട്ട് മന്ത്രി

തിരുവനന്തപുരം: കെ എസ് ആർ ടി സിയിലെ ഐ എൻ ടി യു സി യൂണിയനുകളുടെ കൂട്ടായ്മയായ ടി ഡി എഫ് നടത്തുന്ന പണിമുടക്കിനിടെ ബസുകൾക്ക് കേടുപാടുണ്ടായ സംഭവത്തിൽ അന്വേഷണം. വിഷയത്തെക്കുറിച്ച് സമഗ്രമായി അന്വേഷിക്കണമെന്ന് ഗതാഗതമന്ത്രി കെ ബി ഗണേശ് കുമാർ.

സംഭവത്തെ വളരെ ഗൗരവമായിട്ടാണ് കാണുന്നതെന്നും കെ എസ് ആർ ടി സി ജീവനക്കാരാണ് ബസുകളുടെ വയറിംഗ് നശിപ്പിച്ചതെങ്കിൽ അവരെ പിരിച്ചുവിടുമെന്നും മന്ത്രി ഒരു മാദ്ധ്യമത്തോട് പറഞ്ഞു. കൊട്ടാരക്കരയിലെ എട്ടോളം ബസുകളുടെ വയറിംഗ് നശിപ്പിക്കപ്പെട്ടതായി റിപ്പോർട്ടുകൾ വന്നിരുന്നു. പണിമുടക്കിനിടെ ബസുകൾ സർവീസ് നടത്താതിരിക്കാനാണ് ഇങ്ങനെ ചെയ്തത്.

പണി മുടക്കാൻ ജീവനക്കാർക്ക് അവകാശമുണ്ട്. എന്നാൽ പണി ചെയ്യുന്നവരെ തടസപ്പെടുത്തുന്നതും തൊഴിലിനോട് കൂറില്ലാതെ പെരുമാറുന്നതും മോശമാണ്. കെ എസ് ആർ ടി സിയെ രക്ഷിക്കണമെന്നാണ് ജനങ്ങളുടെ ആഗ്രഹം. അതിനിടയിൽ ഇത്തരത്തിലുള്ള പ്രവൃത്തികൾ ഒരു കാരണവശാലും അംഗീകരിക്കാനാകില്ലെന്നും മന്ത്രി വ്യക്തമാക്കി.