സ്വകാര്യ ബസ് ലോബിയുടെ കൊള്ളയ്ക്ക് അറുതിവരും; അവധിക്കാലത്ത് ആശ്വാസമായി സ്‌പെഷ്യല്‍ ട്രെയിനുകള്‍

കോഴിക്കോട്: അവധിക്കാലത്ത് നാട്ടിലേക്കുള്ള തിക്കും തിരക്കും നിറഞ്ഞ യാത്രകള്‍ക്ക് ചെറിയ ആശ്വാസം നല്‍കുകയാണ് റെയില്‍വേയുടെ സ്‌പെഷ്യല്‍ ട്രെയിന്‍ സര്‍വീസുകള്‍. മേയ് വരെയുള്ള മിക്ക അന്തര്‍സംസ്ഥാന യാത്രകള്‍ക്കും ഇപ്പോള്‍ തന്നെ ടിക്കറ്റുകള്‍ കിട്ടാത്ത സ്ഥിതിയാണ്. തിരക്കില്‍ ലാഭം കൊയ്യുന്നത് സ്വകാര്യബസുകളാണ്. പലപ്പോഴും നിശ്ചിത നിരക്കിന്റെ രണ്ടോ, മൂന്നോ മടങ്ങാണ് ബസുകള്‍ ടിക്കറ്റ് ചാര്‍ജായി ഈടാക്കുന്നത്. ഏറ്റവും കൂടുതല്‍ മലയാളികള്‍ യാത്ര ചെയ്യുന്ന ബംഗളൂരുവില്‍ നിന്നുള്‍പ്പെടെ സ്‌പെഷ്യല്‍ ട്രെയിനുകള്‍ സജ്ജീകരിച്ചിട്ടുണ്ട്. കൂടാതെ ഈസ്റ്ററിനും സ്‌പെഷ്യല്‍ ട്രെയിനുകളുണ്ട്.

മംഗളൂരു ജംഗ്ഷന്‍- തിരുവനന്തപുരം നോര്‍ത്ത്

മംഗളൂരു ജംഗ്ഷന്‍- തിരുവനന്തപുരം നോര്‍ത്ത് സമ്മര്‍ സ്‌പെഷ്യല്‍ ട്രെയിന്‍ (06041) ശനിയാഴ്ചകളില്‍ വൈകീട്ട് 6 ന് മംഗുളൂരു ജംഗ്ഷനില്‍ നിന്ന് പുറപ്പെട്ട് ഞായറാഴ്ച രാവിലെ 6.35 ന് തുരുവനന്തപുരം നോര്‍ത്തിലെത്തും. ഏപ്രില്‍ 19, 26, മേയ് മൂന്ന് എന്നീ ദിവസങ്ങളിലാണ് സര്‍വീസ്.

ഇതേ ട്രെയിന്‍ (06042) തിരിച്ച് ഞായറാഴ്ച വൈകീട്ട് 6.40 ന് തിരുവനന്തപുരം നോര്‍ത്തില്‍ നിന്ന് പുറപ്പെട്ട് തിങ്കളാഴ്ച രാവിലെ ഏഴ് മണിയോടെ മംഗളുരു ജംഗ്ഷനില്‍ എത്തും. പുലര്‍ച്ചെ 1.47 ന് കോഴിക്കോട് എത്തിച്ചേരും. ഏപ്രില്‍ 20,27, മേയ് നാല് എന്നീ ദിവസങ്ങളിലാണ് സര്‍വീസ്.

എസ്.എം.വി.ടി ബംഗളൂരു- തിരുവനന്തപുരം നോര്‍ത്ത്

എസ്.എം.വി.ടി ബംഗളൂരു- തിരുവനന്തപുരം നോര്‍ത്ത് സ്‌പെഷ്യല്‍ ട്രെയിന്‍ ( 06555). ബംഗളൂരുവില്‍ നിന്ന് വെള്ളിയാഴ്ചകളില്‍ രാത്രി 10 ന് പുറപ്പെട്ട് ശനിയാഴ്ച ഉച്ചയ്ക്ക് രണ്ടിന് തിരുവനന്തപുരം നോര്‍ത്തില്‍ എത്തിച്ചേരും. ഏപ്രില്‍ 18, 25, മെയ് രണ്ട്. ഒന്‍പത്, 16, 23, 30 ദിവസങ്ങളിലാണ് സര്‍വീസ്.

ഇതേ ട്രെയിന്‍ (06556) തിരിച്ച് ഞായറാഴ്ച ഉച്ചയ്ക്ക് 2.15 ന് യാത്ര ആരംഭിച്ച് പിറ്റേദിവസം രാവിലെ 7.30 ന് ബംഗളൂരുവില്‍ എത്തും. ഏപ്രില്‍ 20, 27, മെയ് നാല്, 11, 18, 25, ജൂണ്‍ ഒന്ന് ദിവസങ്ങളിലാണ് സര്‍വീസ്.

ലോകമാന്യതിലക്- തിരുവനന്തപുരം നോര്‍ത്ത്

മുംബൈ ലോകമാന്യതിലകില്‍ നിന്നും എല്ലാ വ്യാഴാഴ്ചയും വൈകീട്ട് 4 ന് പുറപ്പെട്ട് വെള്ളിയാഴ്ച രാത്രി 10 .45 ന്

തിരുവനന്തപുരം നോര്‍ത്തില്‍ സര്‍വീസ് അവസാനിക്കുന്ന ലോകമാന്യതിലക്- തിരുവനന്തപുരം നോര്‍ത്ത് സ്‌പെഷ്യല്‍ വീക്ക്ലി ( 01063).

തിരുവനന്തപുരം നോര്‍ത്തില്‍ നിന്ന് എല്ലാ ശനിയാഴ്ചയും വൈകീട്ട് 4.20 ന് യാത്ര തുടങ്ങി തിങ്കള്‍ പുലര്‍ച്ചെ 12.45 ന് ലോകമാന്യതിലകില്‍ എത്തുന്ന തിരുവനന്തപുരം നോര്‍ത്ത് - ലോകമാന്യതിലക് സ്‌പെഷ്യല്‍ വീക്ക്ലി (01064) എന്നീ ട്രെയിനുകളും അവധിക്കാലത്തേക്ക് അനുവദിച്ചവയാണ്. മേയ് 31 വരെ ഈ രണ്ട് ട്രെയിനുകളും സര്‍വീസ് നടത്തും.