തലശേരിയിൽ ഗർഭിണിയെ കൂട്ടമാനഭംഗം ചെയ്തു,​ അന്യസംസ്ഥാന തൊഴിലാളികൾ ഉൾപ്പെടെ മൂന്നുപേർ പിടിയിൽ

കണ്ണൂർ: തലശേരിയിൽ ഗർഭിണിയെ കൂട്ടമാനഭംഗം ചെയ്ത സംഭവത്തിൽ അന്യസംസ്ഥാന തൊഴിലാളികൾ ഉൾപ്പെടെ മൂന്നുപേരെ പൊലീസ് കസ്റ്റഡിയിൽ എടുത്തു. മേലൂട്ട് റെയിൽവേ മേൽപ്പാലത്തിന് അടിയിലാണ് 32കാരി കൂട്ടമാനഭംഗത്തിനിരയായത്. യുവതി ആറാഴ്ച ഗർഭിണിയാണ്. മുഴപ്പിലങ്ങാട് ശ്രീജ ഹൗസിൽ പ്രജിത്ത് (30)​,​ ബീഹാർ കതിഹാർ ദുർഗാപൂർ സ്വദേശി ആസിഫ് (19)​,​ ബീഹാർ കാൺപൂർ സ്വദേശി സഹബൂൽ (24)​ എന്നിവരാണ് കസ്റ്റഡിയിലുള്ളത്.

സ്വകാര്യ ആവശ്യത്തിനായാണ് യുവതി നഗരത്തിൽ എത്തിയത്. കോഴിക്കോട് മെഡിക്കൽ കോളേജിൽ ചികിത്സ തേടിയ യുവതി മാനഭംഗം നടന്നതിനെ കുറിച്ച് ഡോക്ടറെ അറിയിക്കുകയായിരുന്നു. തുടർന്ന് മെഡിക്കൽ കോളേജ് അധികൃതരാണ് പൊലീസിൽ വിവരമറിയിച്ചത്. പരാതിക്കാരി നിലവിൽ പൊലീസ് സംരക്ഷണയിലാണ്.