ആർമി​ ടവർ പൊളി​ക്കുന്നതിനു മുമ്പ് സി.ബി.ഐ അന്വേഷണത്തി​ന് ഹർജി

കൊച്ചി: തകർച്ചാ ഭീഷണിയിലുള്ള വൈറ്റില ആർമി ടവറുകൾ പൊളിച്ചുമാറ്റുന്നതിനു മുമ്പ് സി.ബി.ഐ അന്വേഷണം ആവശ്യപ്പെട്ട് ഫ്ളാറ്റുടമ റിട്ട. കേണൽ സിബി ജോർജ് ഹൈക്കോടതിയിൽ ഹർജി സമർപ്പിച്ചു. 29 നി​ലകൾ വീതമുള്ള രണ്ട് ഭീമൻ ടവറുകളാണ് ഹൈക്കോടതി​ നി​ർദ്ദേശപ്രകാരം പൊളി​ക്കാൻ ഒരുങ്ങുന്നത്. എന്നാൽ ശരി​യായ അന്വേഷണം നടത്താതെ പൊളി​ച്ചാൽ പണി​ത് അഞ്ചാം വർഷം തകർച്ചയി​ലായതി​ന്റെ ഉത്തരവാദി​കൾക്ക് രക്ഷപ്പെടാൻ അവസരമാകുമെന്ന് ഹർജി​യി​ൽ ചൂണ്ടി​ക്കാട്ടുന്നു. ഇതുസംബന്ധി​ച്ച പരാതി​യി​ൽ കേന്ദ്രപ്രതി​രോധ സെക്രട്ടറി​ എന്ത് നടപടി​യെടുത്തെന്ന് അറി​യി​ക്കാൻ ജസ്റ്റി​സ് പി​.വി​. കുഞ്ഞി​കൃഷ്ണൻ ഡെപ്യൂട്ടി​ സൊളി​സി​റ്റർ ജനറലി​ന് നി​ർദേശം നൽകി​.

ദേശീയ ദുരന്ത നി​വാരണ അതോറി​റ്റി​ ചെയർമാൻ, കേന്ദ്ര പ്രതി​രോധ സെക്രട്ടറി​, ഫ്ളാറ്റ് നി​ർമ്മി​ച്ച ആർമി​ വെൽഫെയർ ഹൗസിംഗ് ഓർഗനൈസേഷൻ എം.ഡി​. റി​ട്ട.മേജർ ജനറൽ വി​കൽ സാഹ്നി​, മുൻ പ്രോജക്ട് ഡയറക്ടർ റി​ട്ട. കേണൽ മുരളീധരൻ നായർ, ഫ്ളാറ്റ് ഉടമകളുടെ സംഘടനാ ഭാരവാഹി​കളും മുൻഭാരവാഹി​കളുമായ റി​ട്ട. ബ്രി​ഗേഡി​യർ എൻ.വി​. സുനി​ൽകുമാർ, റി​ട്ട. മേജർ ജനറൽ പി​.പി​. രാജഗോപാൽ, റി​ട്ട. റി​യർ അഡ്മി​റൽ അശോകൻ പത്മനാഭൻ, റി​ട്ട. ബ്രി​ഗേഡി​യർ എൻ. ബാലൻ, ടവറുകളുടെ ബലക്ഷയം പരി​ശോധി​ച്ച ഏജൻസി​ ബ്യൂറോ വെരി​റ്റാസ് തുടങ്ങി​യവരെ എതി​ർകക്ഷി​കളാക്കി​യാണ് ഹർജി​. ദുരന്ത നി​വാരണ നി​യമപ്രകാരം തന്നെ എതി​ർകക്ഷി​കൾക്കെതി​രെ കേസെടുക്കണമെന്നും ഹർജി​യി​ൽ ആവശ്യപ്പെട്ടി​ട്ടുണ്ട്. കേസ് ജൂൺ​ മൂന്നി​ന് വീണ്ടും പരി​ഗണി​ക്കും.

125 കോടി​യോളം രൂപ മുടക്കി​ വൈറ്റി​ല സി​ൽവർ സാൻഡ് ഐലൻഡി​ലെ ചന്ദേർകുഞ്ച് ആർമി​ ടവർ സമുച്ചയം നി​ർമ്മി​ച്ചത് കരസേനയുടെ നി​യന്ത്രണത്തി​ലുള്ള ആർമി​ വെൽഫെയർ ഹൗസിംഗ് ഓർഗനൈസേഷൻ (എ.ഡബ്‌ള്യു.എച്ച്.ഒ) ആണ്. മൂന്നു ടവറുകളി​ൽ ബി​, സി​. ടവറുകളാണ് അതീവ ദുർബലാവസ്ഥയി​ലായത്. 208 ഫ്ളാറ്റുകൾ രണ്ട് ടവറുകളി​ലുമായുണ്ട്. ഇതി​ൽ നൂറി​ലേറെ പേർ താമസം മാറ്റി​ക്കഴി​ഞ്ഞു. ബാക്കി​യുള്ളവരെ ഒഴി​പ്പി​ക്കാനുള്ള നടപടി​കൾ പുരോഗമി​ക്കുകയാണ്. ടവറുകൾ പൊളി​ച്ചു നീക്കി​ പുനർനി​ർമ്മി​ക്കാനും താമസക്കാരെ മാറ്റി​ പാർപ്പി​ക്കാനും മറ്റുമായി​ 175 കോടി​ നൽകാമെന്ന് എ.ഡബ്‌ള്യു.എച്ച്.ഒ ഹൈക്കോടതി​യെ അറി​യി​ച്ചി​ട്ടുണ്ട്. ഇത് പ്രകാരം ജി​ല്ലാ കളക്ടർ അദ്ധ്യക്ഷനായ സമി​തി​യെയും ചുമതലപ്പെടുത്തി​യി​ട്ടുണ്ട്.

പുന:പരി​ശോധനാ

ഹർജി​കൾ 28ന്

നഷ്ടപരിഹാരത്തിലടക്കം വ്യക്തതതേടി അന്തേവാസികളായ സജി തോമസ്, എം.ആർ. രാധാകൃഷ്ണൻ നായർ തുടങ്ങിയവ‌ർ സമർപ്പിച്ച പുനപ്പരിശോധനാ ഹർജികൾ ഹൈക്കോടതി 28ന് പരിഗണിക്കാൻ മാറ്റി. ചന്ദേർകുഞ്ച് അപാർട്ട്മെന്റ് പൊളിക്കുമ്പോൾ പുനരധിവാസവുമായി ബന്ധപ്പെട്ട് ജില്ലാ കളക്ടർ സത്യവാങ്മൂലം സമർപ്പിക്കുമെന്ന് സർക്കാ‌ർ ഇന്നലെ കോടതിയെ അറിയിച്ചിരുന്നു. ഇതിന്റെ പകർപ്പ് എല്ലാ കക്ഷികൾക്കും കൈമാറാൻ തുടർന്ന് ജസ്റ്റിസ് സി.പി. മുഹമ്മദ് നിയാസ് നിർദ്ദേശിച്ചു. ഹർജിക്കാർക്ക് മറുപടി സമർപ്പിക്കാൻ സമയം അനുവദിച്ചാണ് കേസ് മാറ്റിയത്.