അക്ഷരമധുരവുമായി അയ്യപ്പൻകാവിലെ അന്യസംസ്ഥാനക്കുട്ടികൾ

കൊച്ചി: അയ്യപ്പൻകാവ് ശ്രീനാരായണ എച്ച്.എസ്.എസിൽ വായനാവരാഘോഷത്തിന്റെ ഭാഗമായി സംഘടിപ്പിച്ച അക്ഷരമധുരം പരിപാടി അന്യസംസ്ഥാനത്തെ കുട്ടികളുടെ ചങ്ങമ്പുഴ, ഒ.എൻ.വി കവിത ആലാപന മാധുര്യത്താൽ ശ്രദ്ധേയമായി.

ജില്ലയിൽ ഏറ്റവും കൂടുതൽ അന്യസംസ്ഥാന വിദ്യാർത്ഥികൾ പഠിക്കുന്ന വിദ്യാലയങ്ങളിൽ ഒന്നാണ് അയ്യപ്പൻകാവ് ശ്രീനാരായണ ഹയർസെക്കൻഡറി സ്കൂൾ. 'കനക ചിലങ്ക കിലുങ്ങികിലുങ്ങി' എന്നുതുടങ്ങുന്ന ചങ്ങമ്പുഴയുടെ 'കാവ്യനർത്തകി', ''ഇനിയും മരിക്കാത്തഭൂമി! നിന്നാസന്നമൃതിയിൽ നിനക്കാത്മശാന്തി'' എന്നുതുടങ്ങുന്ന ഒ.എൻ.വിയുടെ 'ഭൂമിക്കൊരു ചരമഗീതം' എന്നീ കവിതകൾ രാജസ്ഥാൻ, ബീഹാർ, ബംഗാൾ, തമിഴ്‌നാട് എന്നിവിടങ്ങളിൽ നിന്നുള്ള കുട്ടികൾ മനോഹരമായി ചൊല്ലി

വായനാവാരാചരണം മേയർ അഡ്വ. എം അനിൽകുമാർ ഉദ്ഘാടനം ചെയ്തു. എഴുത്തുകാരനും പ്രഭാഷകനും സീമറ്റ് ട്രെയിനറുമായ കെ.വി അനിൽ കുമാർ മുഖ്യപ്രഭാഷണം നടത്തി. സ്‌കൂൾ മാനേജർ സി.വി. അനിൽകുമാർ അദ്ധ്യക്ഷത വഹിച്ചു. പ്രിൻസിപ്പൽ ടി.ജെ.ജിൻസി, അയ്യപ്പൻകാവ് ശ്രീനാരായണ സമാജം പ്രസിഡന്റ് സി.എം. ശോഭനൻ, സെക്രട്ടറി പി.ഐ. രാജീവ്, അസിസ്റ്റന്റ് സെക്രട്ടറി എ.പി. രഘുനന്ദനൻ, പി.ടി.എ പ്രസിഡന്റ് ജി. ഉണ്ണികൃഷ്ണൻ, ഹെഡ് മിസ്ട്രസ് ലേഖ ലാൽ, ടി.എൻ. വിനോദ്, നിഷ നായർ, എസ്.കിരൺ, ജഗദീശൻ നായർ എന്നിവർ സംസാരിച്ചു.