കെട്ടികിടക്കുന്ന കേസുകൾ തീർപ്പാക്കാൻ 'മീഡിയേഷൻ ഫോർ ദ നേഷൻ'

ജൂലായ് 1 മുതൽ സെപ്‌തംബർ 30 വരെ

ന്യൂഡൽഹി: രാജ്യത്തെ കോടതികളിൽ കെട്ടികിടക്കുന്ന കേസുകൾ തീർപ്പാക്കാൻ 'മീഡിയേഷൻ ഫോർ ദ നേഷൻ' ക്യാമ്പെയിൻ പ്രഖ്യാപിച്ച് നാഷണൽ ലീഗൽ സർവീസസ് അതോറിട്ടി. ജൂലായ് 1 മുതൽ സെപ്‌തംബർ 30 വരെ രാജ്യവ്യാപകമായി മീഡിയേഷൻ ക്യാമ്പെയിൻ സംഘടിപ്പിക്കും. സുപ്രീംകോടതി ചീഫ് ജസ്റ്റിസ് ബി.ആർ. ഗവായ്,​നാഷണൽ ലീഗൽ സർവീസസ് അതോറിട്ടി എക്‌സിക്യൂട്ടീവ് ചെയർമാൻ കൂടിയായ ജസ്റ്റിസ് സൂര്യകാന്ത് എന്നിവരുടെ മേൽനോട്ടത്തിലാണിത്. താലൂക്ക് തലം മുതൽ ഹൈക്കോടതി വരെയുള്ള കേസുകൾ സൗഹാർദ്ദമായും വേഗത്തിലും തീർപ്പാക്കാനാണ് ശ്രമം. ഇതുവഴി ബന്ധങ്ങൾ കാത്തുരക്ഷിക്കാനും,​സമയം,​പണം എന്നിവ ലാഭിക്കാനും കക്ഷികൾക്ക് കഴിയും.

വൈവാഹിക തർക്കങ്ങൾ,​വാഹനാപകട നഷ്‌ടപരിഹാരം,​ഗാർഹികപീഡനം,​ചെക്ക് കേസുകൾ,​സർവീസ് വിഷയങ്ങൾ,​ഒത്തുതീർപ്പാക്കാൻ കഴിയുന്ന ഗുരുതര സ്വഭാവമല്ലാത്ത ക്രിമിനൽ കേസുകൾ,​ഉപഭോക്തൃ പരാതികൾ,​സ്വത്ത് വീതംവയ്‌ക്കലുമായി ബന്ധപ്പെട്ട തർക്കങ്ങൾ തുടങ്ങിയവ പരിഹരിക്കാനാണ് ലക്ഷ്യമിടുന്നത്. ഉചിതമായ കേസുകളുടെ പട്ടിക കോടതികൾ മദ്ധ്യസ്ഥതയ്‌ക്ക് അയക്കും.