കരിപ്പൂരിൽ എയർ  ഇന്ത്യ  വിമാനം  അടിയന്തരമായി  തിരിച്ചിറക്കി; സാങ്കേതിക  തകരാറെന്ന് വിശദീകരണം

മലപ്പുറം:കരിപ്പൂരിൽ നിന്ന് ദോഹയിലേക്ക് പുറപ്പെട്ട എയർ ഇന്ത്യ വിമാനം അടിയന്തരമായി തിരിച്ചിറക്കി. IX 375 നമ്പർ വിമാനമാണ് കരിപ്പൂർ വിമാനത്താവളത്തിൽ തിരിച്ചിറക്കിയത്. സാങ്കേതിക തകരാർ കാരണമാണ് തിരിച്ചിറക്കിയതെന്ന് അധികൃതർ അറിയിച്ചു. എസി തകരാറായി എന്നാണ് വിശദീകരണം.

ഇന്നലെ ഹോങ്കോങ്ങിൽ നിന്ന് ഡൽഹിയിലെത്തിയ എയർ ഇന്ത്യ വിമാനത്തിന് തീപിടിച്ചിരുന്നു. വിമാനം ലാൻഡ് ചെയ്ത് യാത്രക്കാർ ഇറങ്ങുന്നതിനിടെയാണ് തീപിടിത്തമുണ്ടായത്. യാത്രക്കാരും ജീവനക്കാരും സുരക്ഷിതരാണെന്ന് എയർ ഇന്ത്യ അറിയിച്ചു. എ.ഐ 315 നമ്പർ വിമാനം ലാൻഡ് ചെയ്തതിനു പിന്നാലെ ഓക്സിലറി പവർ യൂണിറ്റിലാണ് (എ.പി.യു) തീപിടിച്ചത്. തീപിടിച്ച എ.പി.യുവിന്റെ പ്രവർത്തനം ഉടൻ തന്നെ നിലച്ചു. തീ ഉടൻ നിയന്ത്രണവിധമാക്കിയെന്നും വിമാനത്തിന് ചെറിയ കേടുപാട് സംഭവിച്ചെന്നും അധികൃതർ അറിയിച്ചു.