വിജയ് ദേവരകൊണ്ടയെ വിറപ്പിക്കുന്ന വില്ലനായി മലയാളത്തിന്റെ വെങ്കിടേഷ്; കിങ്‌ഡം ട്രെയ്‌ലർ എത്തി 

'ജേഴ്‌സി' എന്ന സിനിമയിലൂടെ പ്രേക്ഷകരുടെ മനസ്സിൽ ഇടംപിടിച്ച സൂപ്പർ ഹിറ്റ് സംവിധായകൻ ഗൗതം തന്നൂരി ഒരുക്കിയ ബ്രഹ്മാണ്ഡ ആക്ഷൻ ചിത്രം "കിങ്‌ഡം" ട്രെയ്‌ലർ പുറത്ത്. വിജയ ദേവരകൊണ്ട നായകനായി എത്തുന്ന ചിത്രത്തിൽ വില്ലനായി വേഷമിട്ടിരിക്കുന്നത് മലയാളി താരമായ വെങ്കിടേഷ് വി പി എന്ന വെങ്കിയാണ്. വിജയ് ദേവരകൊണ്ടക്കൊപ്പം വെങ്കിയുടെ പ്രകടനത്തിന്റെ ചെറു കാഴ്ച കൂടിയാണ് ട്രെയ്‌ലർ സമ്മാനിക്കുന്നത്.

തെലുങ്കിലും തമിഴിലുമായി ഒരുക്കിയ ചിത്രത്തിൽ രണ്ടു വ്യത്യസ്ത ലുക്കിൽ പക്കാ മാസ് റോളിലാണ് വിജയ് ദേവരകൊണ്ട എത്തുന്നത്. സിത്താര എന്‍റര്‍ടെയ്മെന്‍റും ഫോര്‍ച്യൂണ്‍ 4 സിനിമാസും ചേര്‍ന്ന് നിർമ്മിച്ച ചിത്രത്തിലെ മറ്റു പ്രധാന വേഷങ്ങൾ ചെയ്തിരിക്കുന്നത് സത്യ ദേവ്‌, ഭാഗ്യശ്രീ ബോർസെ എന്നിവരാണ്. ഗംഭീര ആക്ഷൻ രംഗങ്ങളാണ് ചിത്രത്തിന്റെ ഹൈലൈറ്റ് എന്ന സൂചനയാണ് ട്രെയ്‌ലർ നൽകുന്നത്. ജൂലൈ 31 നാണ് ചിത്രം ആഗോള റിലീസായി എത്തുന്നത്. ദുൽഖർ സൽമാന്റെ വേഫറെർ ഫിലിംസ് ചിത്രം കേരളത്തിലെത്തിക്കും.

മലയാളത്തിൽ ഒരുപിടി ശ്രദ്ധേയമായ ചിത്രങ്ങളിലൂടെ പ്രേക്ഷകർക്ക് പരിചിതനായ വെങ്കിടേഷിന്റെ തെലുങ്കിലെ അരങ്ങേറ്റ ചിത്രമായാണ് 'കിങ്‌ഡം' എത്തുന്നത്. "നായികാ നായകൻ" എന്ന റിയാലിറ്റി ഷോയിലെ മികച്ച ഹാസ്യ നടനുള്ള പുരസ്‌കാരം നേടി ശ്രദ്ധേയനായ വെങ്കിടേഷ്, അതിനു ശേഷം പ്രണയ നായകൻ ആയും വൈകാരിക ആഴമുള്ള കഥാപാത്രങ്ങളിലും മികച്ച പ്രകടനം നടത്തി ശ്രദ്ധ നേടി. ലവ്ഫുള്ളി യുവേഴ്സ് വേദ, സ്റ്റാൻഡ് അപ് തുടങ്ങിയ ചിത്രങ്ങളിലെ വെങ്കിടേഷിന്റെ പ്രകടനത്തിന് വലിയ പ്രേക്ഷക- നിരൂപക പ്രശംസയാണ് ലഭിച്ചത്. മമ്മൂട്ടി നായകനായ "ദി പ്രീസ്റ്റ്" എന്ന ചിത്രത്തിലും വെങ്കി നടത്തിയത് ശ്രദ്ധേയമായ പ്രകടനമാണ്. ഇപ്പോഴിതാ കിങ്‌ഡം എന്ന ചിത്രത്തിലൂടെ തന്റെ പ്രതിഭയുടെ മറ്റൊരു തലം പ്രദർശിപ്പിക്കാൻ ഒരുങ്ങുകയാണ് വെങ്കിടേഷ്.

ഛായാഗ്രഹണം- ജോമോൻ ടി ജോൺ, ഗിരീഷ് ഗംഗാധരൻ, സംഗീതം- അനിരുദ്ധ് രവിചന്ദർ, എഡിറ്റിംഗ്- നവീൻ നൂലി, പ്രൊഡക്ഷൻ ഡിസൈൻ- അവിനാശ് കൊല്ല, വസ്ത്രാലങ്കാരം- നീരജ് കൊന, ആക്ഷൻ- യാനിക്ക് ബെൻ, ചേതൻ ഡിസൂസ, റിയൽ സതീഷ്, സൗണ്ട് ഡിസൈൻ- സിങ്ക് സിനിമ, ഓഡിയോഗ്രഫി- വിനയ് ശ്രീധർ.