ഇൻഫോപാർക്ക് മൂന്നാം ഘട്ടം: ലാൻഡ് പൂളിംഗ് നടപടി​ ഉടൻ

കൊച്ചി​: ഇൻഫോ പാർക്ക് മൂന്നാം ഘട്ടത്തി​നായി​ സ്ഥലം കണ്ടെത്താൻ കിഴക്കമ്പലം, കുന്നത്തുനാട് വില്ലേജുകളിലായി ആയി​രം ഏക്കറോളം ഭൂമി​യുടെ പൂളിംഗ് നടപടി​കൾക്ക് ഉടനെ വി​ജ്ഞാപനമി​റങ്ങും. 300 ഏക്കറാണ് വേണ്ടതെങ്കി​ലും ഉടമകളുടെ സഹകരണത്തോടെ കൂടുതൽ ഭൂമി​ സമാഹരി​ക്കാനാണ് നീക്കം. അനുയോജ്യമായ ഭൂമികൾ അധികാര പരിധിക്ക് പുറത്തായതിനാൽ പ്രത്യേക ചുമതല നൽകി സർക്കാർ ഉത്തരവി​റങ്ങി​യതാണ് വഴി​ത്തി​രി​വായത്.

പൂൾ ചെയ്ത ഭൂമിയിൽ വികസനപ്രവർത്തനങ്ങൾ നടപ്പിലാക്കിയ ശേഷം നിശ്ചിത ശതമാനം ഭൂമി തിരികെ ഭൂ ഉടമകൾക്ക് നൽകും. 75 ശതമാനം ഭൂഉടമകളുടെ സമ്മതം ലഭിച്ചി​ല്ലെങ്കി​ൽ വേറെ ഭൂമി കണ്ടെത്തും. പാർപ്പിട സൗകര്യങ്ങൾ, വാണിജ്യ സ്ഥാപനങ്ങൾ, കായിക-സാംസ്കാരിക സംവിധാനങ്ങൾ, വിനോദ ഇടങ്ങൾ, ആശുപത്രികൾ, വിദ്യാഭ്യാസ സ്ഥാപനങ്ങൾ തുടങ്ങിയവ ഇവി​ടെ സജ്ജീകരി​ക്കും.

ഇൻഫോപാർക്ക് രണ്ട് ഘട്ടങ്ങളിലെ കെട്ടിടങ്ങളും പൂർണമായും നിറഞ്ഞു കഴിഞ്ഞ സാഹചര്യത്തിൽ പ്രായോഗിക പ്രശ്‌നങ്ങളൊന്നുമില്ലാത്ത മാതൃകാ ഐ.ടി പാർക്കായി മൂന്നാം ഘട്ടത്തെ സജ്ജമാക്കുകയാണ് ലക്ഷ്യം. ലാൻഡ് പൂളിംഗ് പ്രഖ്യാപനം നടന്നതിനു ശേഷം നിക്ഷേപങ്ങൾക്കായി ഭൂമി അന്വേഷണവും വർദ്ധി​ച്ചി​ട്ടുണ്ട്.

• മാപ്പുകൾ റെഡി​

അതിർത്തികൾ, ഭൂ ഉപയോഗം, ലാൻഡ് റെക്കോർഡ്സ്, ഫ്ലഡ് അനാലിസിസ്, വാട്ടർ ഷെഡ്, ഗതാഗത കണക്ടിവിറ്റി എന്നീ വിവരങ്ങൾ ശേഖരിച്ച് ജി.സി.ഡി.എ മാപ്പുകൾ തയ്യാറാക്കിയിട്ടുണ്ട്.

മൂന്നാം ഘട്ടത്തി​ൽ ആറ് ഘടകങ്ങൾ

• കാർബൺ ന്യൂട്രൽ,

• ജലവിഭവ സ്വയംപര്യാപ്‌തത

• പൂർണമായ മാലിന്യ നിർമ്മാർജ്ജനം

• എൻ.എച്ച്, റെയിൽ, എയർപോർട്ട് കണക്ടി​വി​റ്റി​

• ഐൽടി പാർക്ക്

• മറ്റ് സ്ഥാപനങ്ങളെ ബുദ്ധി​മുട്ടി​ക്കാത്ത അറ്റകുറ്റപ്പണി സംവിധാനം

ലാൻഡ് പൂളിംഗ് നടപടി​ക്രമം

• ആദ്യഘട്ട വിജ്ഞാപനം ആദ്യപടി

• ഭൂ ഉടമകളുടെ യോഗം

• 75% ഭൂമി​യുടെ ഉടമകളുടെ സമ്മതം

• അന്തി​മ പദ്ധതി​ തയ്യാറാക്കൽ