ബിന്ദു പത്​മനാഭൻ തിരോധാനം........... ഡി.എൻ.എ പരിശോധനയ്ക്കായി സഹോദരന്റെ സാമ്പിളെടുത്തു

ആലപ്പുഴ: ​ചേർത്തലയിലെ ബിന്ദുപത്​മനാഭന്റെ തിരോധനവുമായി ബന്ധപ്പെട്ട് ഡി.എൻ.എ പരിശോധനയ്ക്കായി​​ സഹോദരൻ പ്രവീണിന്റെ രക്തസാമ്പിളുകൾ ശേഖരിച്ചു. പ്രതി സെബാസ്​റ്റ്യന്റെ വീട്ടുവളപ്പിൽനിന്ന്​ ക​ണ്ടെത്തിയ അസ്ഥികൾ ആരുടേതാണെന്ന്​ ഉറപ്പിക്കുന്നതിന്റെ ഭാഗമായാണ് ആലപ്പുഴ ജനറൽ ആശുപത്രിയിൽ എത്തിച്ച് സാമ്പിൾ ശേഖരിച്ചത്. ഇറ്റലിയിലായിരുന്ന സഹോദനെ ആലപ്പുഴയിലെ ​ക്രൈംബ്രാഞ്ച്​ ഓഫിസിലേക്ക് വിളിച്ചുവരുത്തുകയായിരുന്നു. പ്രത്യേകസംഘം മണിക്കൂറുകൾ സമയമെടുത്ത് പ്രവീണിന്റെ​ മൊഴി രേഖപ്പെടുത്തി​.

2017ലാണ്​ ബിന്ദുവിനെ കാണാനില്ലെന്ന്​ പ്രവീൺ ആഭ്യന്തരവകുപ്പ്​ സെക്രട്ടറിക്ക്​ പരാതി നൽകിയത്​. ചേർത്തല കടക്കരപ്പള്ളി സ്വദേശിനിയൂം കോടികളുടെ സ്വത്തിന്​ ഉടമയുമായ ബിന്ദു പത്മനാഭനും സെബാസ്​റ്റ്യനും തമ്മിലുള്ള ഇടപാടിൽ വസ്തുക്കൾ നഷ്ടമായ സാഹചര്യത്തിൽ എട്ട്​ പേജുള്ള വിശദ പരാതിയാണ്​ അന്ന്​ നൽകിയത്​. ബിന്ദുവിന്റെ സ്വത്തുക്കൾ ആൾമാറാട്ടം നടത്തിയും വ്യാജരേഖ ചമച്ചും സ്വന്തമാക്കിയെന്നും പരാതിയിൽ പറഞ്ഞിരുന്നു. അന്ന്​ കേസ്​ അന്വേഷിച്ച ലോക്കൽപൊലീസ്​ എഫ്​.ഐ.ആർ ഇടുന്നതടക്കമുള്ള കാര്യങ്ങളിൽ വീഴ്​ചവരുത്തിയതോടെയാണ്​ ചേർത്തല പള്ളിപ്പുറം സ്വദേശി സി.എം.സെബാസ്റ്റ്യന്റെപങ്ക്​ തെളിയായിരുന്നത്​. കാണാതായ ബിന്ദുവിനെ സെബാസ്​റ്റ്യന്റെ വീട്ടില്‍ കണ്ടതായി ബന്ധുവും അന്ന്​ മൊഴി നൽകിയിരുന്നു. ബിന്ദുവിന്റെ സ്വത്തുക്കൾ ഈടായി നൽകിയതിന്​ പുറമെ പട്ടണക്കാട്, ചേർത്തല, അമ്പലപ്പുഴ, ഇടപ്പള്ളി സബ് റജിസ്ട്രാർ ഓഫിസുകളിൽ രജിസ്​റ്റർ ചെയ്ത കോടിക്കണക്കിനു രൂപ വിലയുള്ള വസ്തുക്കൾ പലർക്കായി വിറ്റതായും പൊലീസ് കണ്ടെത്തിയിരുന്നു.

സെബാസ്​റ്റ്യൻ പറയുന്നത്​ പച്ചക്കളളം; പ്രവീൺ
ബിന്ദുപത്​മനാഭന്റെ തിരോധാനവുമായി ബന്ധപ്പെട്ട്​ പ്രതി സെബാസ്​റ്റ്യൻ തുടക്കംമുതൽ പറയുന്നത്​ പച്ചക്കള്ളമാണെന്ന്​ പ്രവീൺ പറഞ്ഞു. കേസന്വേഷണവുമായി ബന്ധപ്പെട്ട്​ ആലപ്പുഴ ക്രൈംബ്രാഞ്ച്​ ഓഫിസിലെത്തിയശേഷം മാദ്ധ്യമപ്രവർത്തകരോട്​ സംസാരിക്കുകയായിരുന്നു അദ്ദേഹം. 2017ൽ ​പൊലീസിൽ പരാതി കൊടുക്കുന്നതിന്​ മുമ്പും ശേഷവും ​സെബാസ്റ്റ്യനെ കണ്ടിരുന്നു. തുടക്കം മുതൽ സെബാസ്​റ്റ്യന്റെ പങ്കിനെക്കുറിച്ച്​ സംശയമുണ്ട്​. ബിന്ദുമായുള്ള വസ്തു ഇടപാട്​ ചോദിച്ചറിയാൻ സെബാസ്​റ്റ്യനെ പലതവണകാണാ​ൻശ്രമിച്ചു. സമയം തരാൻ തന്നെ നാലുമാസം എടുത്തു. സെബാസ്​റ്റ്യനെ കാണാൻ ചെന്നപ്പോൾ പറഞ്ഞത്​ മുഴുവൻ പച്ചകള്ളമാണ്​. മനോജ്​ എന്നയാളെ പുറത്ത്​ നിർത്തിയിരുന്നു. ചേർത്തയിലെ സ്വകാര്യബാങ്കിൽ ബിന്ദു 50ലക്ഷം രൂപ നിക്ഷേപിച്ചിട്ടുണ്ടെന്നും അത്​ അടുത്തദിവസംപോയി എടുക്കാമെന്നും സെബാസ്റ്റ്യൻ പറഞ്ഞു. പിന്നീട്​ നേരിട്ടെത്തി അന്വേഷിച്ചപ്പോൾ ബാങ്കിൽ പണമില്ലെന്ന്​ ​ബോദ്ധ്യപ്പെട്ടു. ബിന്ദുവിനെ കാണാതായെന്ന പരാതി മാത്രമല്ല പൊലീസിൽ നൽകിയത്​. ആഭ്യന്തരവകുപ്പിന്​ നൽകിയ എട്ട്​ പേജുള്ള വിശദമായ പരാതിയിൽ സെബാസ്​റ്റ്യനുമായുള്ള വസ്തു ഇടപാടടക്കം ചൂണ്ടിക്കാണിച്ചിരുന്നു. 1999ലാണ്​ ഇറ്റലിയിലേക്ക്​ പോയത്​. പിന്നീടൊരിക്കലും ബിന്ദുവിനെ കണ്ടിട്ടില്ല. ഹൈറേഞ്ചിലെ വീടുപണിയുമായി ബന്ധപ്പെട്ട്​ 2016ലാണ്​ നാട്ടിലെത്തിയത്​. അക്കാലത്ത്​ അമ്പലപ്പുഴയിലെ അമ്മാവൻ പറഞ്ഞാണ്​ ബിന്ദുവിനെ കാണാതായ വിവരം അറിഞ്ഞതെന്നും പ്രവീൺ പറഞ്ഞു